श्रीगोंदा । नगर सहयाद्री:-
श्रीगोंदा तालुक्यातील एका हॉटेलमध्ये वास्तव्यास असलेल्या तरुणीची हत्या करून मृतदेहाची विल्हेवाट लावल्याची खळबळजनक घटना रविवारी उघडकीस आली. फातिमा उर्फ आसमा शोयबउल्ला शेख असे खून झालेल्या महिलेचे नाव आहे. याप्रकरणी संशयित आरोपी कल्याण राजेंद्र पठारे (रा. बनपिंप्री) यास पोलिसांनी अटक केली आहे.
नगर जिल्ह्यातील श्रीगोंदा तालुक्यामधील एका बड्या नेत्याचे गाव असलेलया बनपिंप्रीतील हॉटेल प्रशांत मध्ये सदरचा प्रकार घडला. फातिमाचा मृतदेह हातवळण (ता. अहिल्यानगर) येथील शेत गट क्रमांक 111 मध्ये पुरण्यात आला होता. कल्याण पठारे हा या हॉटेलचा चालक असल्याची माहिती समोर आली असून त्याने गुन्ह्यांची कबूली दिली आहे.
संशयित आरोपीने आपल्या इतर साथीदारांच्या मदतीने स्कॉर्पिओ (एमएच 16 एटी 6979) वाहनातून मृतदेह नेऊन शेतात पुरल्याचे निष्पन्न झाले आहे. याप्रकरणी पोलीस उपनिरीक्षक मनोहर हनुमंत खिळदकर यांनी दिलेल्या फिर्यादीवरून रविवारी (18 मे) पहाटे कल्याण पठारे व त्याच्या साथीदारांविरूध्द गुन्हा दाखल करण्यात आला आहे.
