बीड । नगर सहयाद्री:-
बीड जिल्ह्यातील तपभूमी येथील वारकरी संप्रदायाच्या संस्थानात महाराज आणि त्यांच्या सहकाऱ्यांनी चक्क विद्यार्थ्याच्या पालकाला अमानुष मारहाण केल्याची धक्कादायक घटना उघडकीस आली आहे. अॅडमिशन रद्द झाल्यानंतर भरलेले डोनेशन मागितल्याने संतप्त झालेल्या संस्थाचालकांनी पालकाला खोलीत कोंडून मारहाण केली. या घटनेमुळे जिल्ह्यात खळबळ उडाली आहे.
गेवराई तालुक्यातील चिखली येथील मनोहर कचरू वारे यांनी आपल्या मुलाला तपभूमीच्या वारकरी शिक्षण संस्थेत शिकण्यासाठी पाठवले होते. यावेळी संस्थेचे सत्यवान महाराज लाटे यांनी ५० हजार रुपयांचे डोनेशन मागितले, त्यातील ३० हजार रुपये वारे यांनी भरले. मात्र काही कारणास्तव अॅडमिशन रद्द करण्यात आले. अॅडमिशन रद्द झाल्यानंतर वारे यांनी संस्थेकडे भरलेले पैसे मागितले.
संतप्त होऊन महाराज आणि त्यांच्या चार सहकाऱ्यांनी “पैसे मागतोस? तुला बाहेर जाऊ देणार नाही,अशी धमकी देत वाऱेंना संस्थानातील खोलीत कोंडले आणि अमानुष मारहाण केली. या मारहाणीचा व्हिडीओ सध्या सोशल मीडियावर व्हायरल होत आहे. यात मनोहर वारे यांना पायावर, पाठीवर आणि हातावर मारहाण होत असल्याचे स्पष्ट दिसते. त्यांना बीड जिल्हा रुग्णालयात दाखल करण्यात आले असून प्रकृती स्थिर आहे.
या प्रकरणी बीड ग्रामीण पोलीस ठाण्यात सत्यवान महाराज लाटे आणि त्यांच्या चार सहकाऱ्यांविरोधात गुन्हा दाखल करण्यात आला आहे. धार्मिक आणि अध्यात्मिक शिक्षण देणाऱ्या संस्थांमध्ये घडणारी ही घटना केवळ धक्कादायकच नव्हे, तर संप्रदायाच्या नावाखाली होत असलेल्या गैरप्रकारांवर प्रश्नचिन्ह निर्माण करणारी आहे. पोलिसांनी या प्रकरणाचा सखोल तपास करून दोषींवर कठोर कारवाई करावी, अशी नागरिकांकडून मागणी होत आहे.
