युवकाविरुद्ध गुन्हा दाखल
अहिल्यानगर | नगर सह्याद्री
नवनागापूर येथील गजानन कॉलनीत सोमवारी सायंकाळी तलवार व कोयता घेऊन फिरत दहशत निर्माण करणाऱ्या एका 24 वषय युवकाविरोधात एमआयडीसी पोलिसांनी गुन्हा दाखल केला आहे. अनिश बाळू पवार (रा. गजानन कॉलनी) असे आरोपीचे नाव असून तो सार्वजनिक ठिकाणी लोखंडी धारदार शस्त्र घेऊन फिरताना दिसून आल्याचे पोलीस तपासात निष्पन्न झाले.
ही घटना 16 जून रोजी सायंकाळी 6.25 वाजता घडली. पोलीस नाईक नवनाथ दहीफळे यांच्या फिर्यादीवरून आरोपीविरोधात गुन्हा नोंदवण्यात आला आहे. घटनेची माहिती मिळताच एमआयडीसी पोलीस स्टेशनचे सपोनि एम.बी. चौधरी व पो.ना पालवे यांनी घटनास्थळी भेट देत पाहणी केली.
आरोपीकडे असलेल्या तलवार व कोयत्यामुळे परिसरात काही वेळ तणावाचे वातावरण निर्माण झाले होते. घटनास्थळी पंचनामा करण्यात आला असून, शस्त्रे जप्त करण्यात आली आहेत. आरोपीचा पोलिसांकडून तपास सुरू आहे.
