Maharashtra Politics: विधानसभा निवडणुकीसाठी भाजपने आपली पहिली यादी जाहीर केली आहे. आपल्या पहिल्याच यादीत भाजपने ९० उमेदवारांच्या नावाची घोषणा केली आहे. यातच भाजपने राहुरी मतदारसंघात शिवाजी कर्डीले यांना उमेदवारी जाहीर केली आहे. मात्र त्यांच्या उमेदवारीला आता भाजप विरोध होत आहे. त्यांना उमेदवारी दिल्यामुळे कदम कटूंब नाराज आले असून महायुतीची साथ सोडण्याचा निर्णय त्यांनी घेतला आहे.
राहुरी विधानसभा मतदारसंघात भाजप कडून सत्यजित कदम इच्छुक होते.मात्र उमेदवारी माजी आमदार शिवाजी कर्डीले यांना जाहिर झाली. त्यामुळे सत्यजित कदम आणि त्यांचे वडील माजी आमदार चंद्रशेखर कदम यांनी भाजपची साथ सोडण्याचा निर्णय घेतला असून भाजपविरोधात बंडाचे निशाण फडकवण्याची शक्यता आहे.
२०१९ ला देखील चंद्रशेखर कदम यांनी आपला मुलगा सत्यजित यांच्यासाठी पक्षाकडे राहुरी विधानसभेची मागणी केली होती. मात्र पक्षाने त्यांना सबुरीचा सल्ला देत शिवाजी कर्डिले यांनी उमेदवारी दिली होती. अनेकदा पक्षाचा आदेश मानून निवडणुकीतून माघार घेतली होती. मात्र आता कार्यकर्ते जे सांगतील त्यानुसार निर्णय घेणार असल्याचे सत्यजित कदम यांनी सांगितले आहे.