पंढरपूर / नगर सह्याद्री –
मराठा आंदोलनक मनोज जरांगे पाटील यांनी विधानसभा निवडणुकीसाठी चाचपणी सुरू केली आहे. त्यांनी विधानसभा निवडणूक लढवण्याची घोषणा केली. सध्या राज्यातील सर्वच मतदारसंघामध्ये त्यांनी मोर्चेबांधणी सुरू केली आहे. ते या निवडणुकीमध्ये सर्व मतदारसंघामध्ये उमेदवार उभे करणार असल्याचे स्पष्ट झाले आहे. त्यामुळे इतर राजकीय पक्षांचे टेन्शन वाढले आहे.
मनोज जरांगे पाटील यांच्या निवडणूक लढवण्याच्या निर्णयावर ओबीसी नेते लक्ष्मण हाके यांनी जहरी टीका केली आहे. ‘विधानसभा निवडणुका लढवण्याची मनोज जरांगेंची लायकी नाही.’, असं विधान त्यांनी केले आहे.
लक्ष्मण हाकेंनी जरांगे पाटील यांच्यावर टीका करताना सांगितले की, ‘मराठा आंदोलक मनोज जरांगे पाटील यांना आरक्षणाचा मुद्दा कळलाच नाही. जरांगे हे निवडणुका लढू शकत नाहीत. त्यांची निवडणुका लढवाव्या इतकी हैसियत नाही. राजकारण आणि निवडणुका यांच्या बाहेर जरांगे यांना कुठलाही इंटरेस्ट नाही. त्यामुळे मनोज जरांगे हे निवडणुका लढवणार नाहीत.’, असा दावा ओबीसी नेते लक्ष्मण हाके यांनी केला आहे.
लक्ष्मण हाके हे आज पंढरपुरात आले होते. यावेळी त्यांनी माध्यमांशी संवाद साधला. तसेच,’येत्या निवडणुकीत ओबीसी प्रश्नाबाबत ज्या नेत्यांनी पक्षांनी ओबीसी प्रश्नावर भूमिका घेतली नाही. अशा नेत्यांच्या आमदारकीच्या वाटा ओबीसी लोकांच्या वाड्या वस्त्यावरून जातात. त्यामुळे ओबीसी प्रश्नावर न बोलणाऱ्या नेत्यांना या निवडणुकीत आम्ही घरी बसवू.’ असा इशारा लक्ष्मण हाके यांनी दिला आहे.