आ. काशिनाथ दाते यांनी मंत्री राधाकृष्ण विखे पाटील यांची घेतली भेट
पारनेर | नगर सह्याद्री
पारनेर तालुक्यावर विखे कुटुंबाचे विशेष प्रेम आहे. पारनेर तालुक्याच्या विकासासाठी नेहमीच कटिबद्ध असून काशिनाथ दाते यांच्या माध्यमातून आता तालुक्यात विकास कामांना भरीव निधी देणार असल्याचे मंत्री राधाकृष्ण विखे पाटील यांनी सांगितले.
नवनिर्वाचित आमदार काशिनाथ दाते सर यांनी मुंबई येथे राज्याचे महसूल मंत्री राधाकृष्ण विखे पाटील यांची भेट घेतली. यावेळी मंत्री विखे पाटील म्हणाले, सुपा या ठिकाणी असलेल्या एमआयडीसीच्या माध्यमातून स्थानिक युवकांना रोजगार उपलब्ध करून देणार असून तालुक्यातील वाढती गुन्हेगारी व दहशतवाद मोडीत काढण्यासाठी प्रयत्नशील आहे व तालुक्यातील अवैद्य धंद्यांना आळा घालण्यासाठी या पुढील काळात प्रामुख्याने प्रयत्न करणार आहे.
पारनेर तालुका एक पुरोगामी विचारांचा सुसंस्कृत तालुका आहे. मतदारसंघ आता एका चांगल्या माणसाच्या हातात आल्यामुळे निश्चितच तालुक्याचा विकास होणार असून आम्ही काशिनाथ दाते यांच्या पाठीमागे सक्षमपणे उभे असल्याचे त्यांनी सांगितले.
भाजप प्रदेश कार्यकारणी सदस्य विश्वनाथ कोरडे, माजी जिल्हा परिषद सदस्य वसंत चेडे, जिल्हा बँकेचे संचालक प्रशांत गायकवाड, भाजप जिल्हा उपाध्यक्ष सुभाष दुधाडे, लाडके बहीण योजना समितीचे तालुका अध्यक्ष सुनील थोरात, सरपंच मनोज मुंगसे आदी. यावेळी उपस्थित होते.
