अहिल्यानगर । नगर सहयाद्री :-
भिंगार शहरातून जाणाऱ्या सर्व एसटी बस गाड्यांना भिंगारमध्ये थांबा देण्याचे आदेश विभाग नियंत्रक अधिकाऱ्यांनी दिले आहेत. तसेच भिंगार येथील बसस्थानकाच्या दुरुस्तीसाठी विभागीय स्थापत्य अधिकाऱ्यांना कळविण्यात आले असल्याचे लेखी पत्र अहिल्यानगर विभाग नियंत्रक अधिकारी यांनी भिंगार भाजापाचे मंडल अध्यक्ष सचिन जाधव यांना दिले आहे. भाजपाच्या भिंगार मंडलाच्या पाठपुराव्यास यश आले असून सर्व एसटी गाड्या आता भिंगार स्थानकात थांबत आहेत.
भिंगार भाजप मंडलाच्या वतीने भिंगार शहरातून जाणाऱ्या एसटी बस गाड्या भिंगारमध्ये थांबात नसल्याने प्रवाश्यांची मोठी गैरसोय होत असल्याचे निवेदन काही दिवसांपूव अहिल्यानगर विभाग नियंत्रक अधिकाऱ्यांना देण्यात आले होते. या निवेदनाची दखल घेऊन राज्य परिवहन विभाग नियंत्रक अधिकारी यांनी आदेश दिले आहेत.
या पत्रात नमूद केले आहे की, भिंगार मार्गे जाणाऱ्या सर्व एसटी गाड्या भिंगार बसस्थानकात जाऊन प्रवासी चढ-उतार करण्याबाबत सूचित करण्यात येत आहे. अहिल्यानगर पाथड व अहिल्यानगर शेवगाव या मार्गावरील भिंगार मार्गे जाणाऱ्या सर्व बसेस जाता येता भिंगार येथे थांबवून प्रवासी चढ-उतार करण्याच्या सूचना करण्यात येत आहेत. प्रवाशांची विद्यार्थ्यांची कोणतीही तक्रार उद्भवणार नाही याची दक्षता सर्व वाहक व चालकांनी घ्यावी, असे आदेश दिले आहेत.
याबाबत भिंगार भाजपाचे मंडल अध्यक्ष सचिन जाधव यांनी विभाग नियंत्रक अधिकाऱ्यांचे आभार मानले असून भिंगार बसस्थानकाचे दुरुस्तीचे काम लवकरात लवकर काम हाती घेऊन प्रवाश्यांना चांगल्या सोयीसुविधा उपलब्ध कराव्यात, अशी मागणी केली आहे.
