निघोज | नगर सह्याद्री
राज्याचे जागृत देवस्थान असलेल्या मळगंगा देवीची घटस्थापना विधिवत पूजा करीत उत्साहात पार पडली. यावेळी पोपट महाराज देशपांडे यांनी देवीची विधिवत पूजा केली. देवीचे पुजारी विकास गायखे व त्यांच्या कुटुंबातील महिलांनी देवीचे औक्षण करीत घटस्थापना केली.
यंदा पाऊसपाणी भरपूर झाल्याने तसेच शेतीला आर्थिक समृद्धीचे दिवस असल्याने सर्वत्र नवरात्र उत्सव मोठ्या उत्साहात साजरा होणार आहे. मळगंगा देवीच्या दर्शनासाठी राज्यातील विविध भागांतून मोठ्या संख्येने भाविक नवरात्र उत्सवात येत असतात. पहाटे तीन ते पाच देवीची महापूजा झाल्यानंतर महाआरती होऊन दिवसभर दर्शनासाठी रांगा लागतात.
सायंकाळी सात वाजता पुन्हा महाआरती होत असते. देवीच्या पूजेचा मान गायखे कुटुंबाला असून महाआरतीसाठी संबळाचा मान दुणगुले कुटुंबाला आहे. मळगंगा ग्रामीण विकास ट्रस्ट, निघोज ग्रामस्थ व मुंबईकर मंडळ तसेच ग्रुप ग्रामपंचायत व मळगंगा यात्रा उत्सव समिती नवरात्र उत्सव यासाठी नियोजन करीत असतात. दहाव्या दिवशी होमहवन, त्यानंतर विजयादशमीदिनी मळगंगा देवीचा पालखी सोहळा होतो.
जगप्रसिद्ध रांजणखळगे परिसरातील मळगंगा देवीच्या मंदिरात घटस्थापना करण्यात आली. गावातील व कुंडावरील मंदिरांत नवरात्र उत्सवात चोवीस तास समया तेवत राहतात. यासाठी हजारो महिला भाविक या समयांना तेल देत असतात. मंदिरापुढील नंदादीप तेवत ठेवतात. मंदिरावर आकर्षक विद्युत रोषणाई करण्यात आली आहे. कुंड माउली नवरात्र उत्सव मंडळाने प्रवचन व किर्तनाचे आयोजन केले आहे.
तसेच सुंदर गाण्यांचा कार्यक्रम ठेवला असून महाप्रसाद म्हणून सााबुदाणा खिचडी देण्यात येणार आहे. निघोज येथे मळगंगा ग्रामीण विकास ट्रस्ट, निघोज ग्रामस्थ व मुंबईकर मंडळ यांनी आठ दिवस भजन संध्या, दांडिया रास, मळगंगा आईचा जागर, खेळ पैठणीचा अशाप्रकारे विविध कार्यक्रमांचे आयोजन केले आहे. या कार्यक्रमांसाठी भावीक भक्तांनी मोठ्या संख्येने उपस्थित राहावे असे आवाहन करण्यात आले आहे.
