मुंबई । नगर सहयाद्री
‘काँटा लगा गर्ल’ म्हणून ओळख निर्माण केलेली आणि ‘बिग बॉस १३’ फेम अभिनेत्री शेफाली जरीवाला हिचं ४२ व्या वर्षी निधन झालं आहे. हृदयविकाराच्या तीव्र झटक्यामुळे तिचा मृत्यू झाला, अशी माहिती समोर आली असून, तिच्या आकस्मिक निधनाने संपूर्ण मनोरंजनसृष्टीवर शोककळा पसरली आहे.
२७ जूनच्या रात्री शेफालीच्या छातीत अचानक दुखू लागल्यामुळे तिला अंधेरीतील एका खासगी रुग्णालयात दाखल करण्यात आलं. तिच्यासोबत तिचा पती पराग त्यागी आणि कुटुंबातील काही सदस्य होते. मात्र, रुग्णालयात दाखल होताच डॉक्टरांनी तिला मृत घोषित केलं. शेफालीच्या निधनामुळे अनेक कलाकारांनी सोशल मीडियावर तीव्र शोक व्यक्त केला आहे.
अभिनेता अली गोनी, राजीव अदातिया आणि इतर कलाकारांनी सोशल मीडियाच्या माध्यमातून शेफालीला श्रद्धांजली वाहिली आहे. “ही बातमी धक्कादायक आणि हृदयद्रावक आहे,” अशा शब्दांत त्यांनी भावना व्यक्त केल्या आहेत.शेफाली जरीवालाने २००२ मध्ये आलेल्या ‘काँटा लगा’ या रिमिक्स गाण्याच्या माध्यमातून लोकांच्या मनात घर केलं.
हे गाणं प्रचंड गाजल्यानंतर तिला ‘काँटा लगा गर्ल’ अशी ओळख मिळाली. त्यानंतर तिनं ‘मुझसे शादी करोगी’, ‘नच बलिए ५’, आणि ‘बिग बॉस १३’ सारख्या रिअॅलिटी शोमध्ये सहभाग घेतला होता. तिची स्टाईल, आत्मविश्वास आणि स्क्रीन प्रेझेन्स यामुळे ती नेहमीच चर्चेत राहिली.शेफालीच्या आकस्मिक निधनानंतर तिच्या चाहत्यांनी सोशल मीडियावर दुःख व्यक्त करत, तिच्या जुन्या गाण्यांचे आणि कार्यक्रमांचे व्हिडिओ शेअर करत श्रद्धांजली वाहिली आहे.
