माजी सभापती अभिलाष घिगे, सरपंच भाऊसाहेब बहिरट यांची महावितरणकडे मागणी
सुनील चोभे | नगर सह्याद्री
गेल्या आठ- दहा दिवसांपासून नगर तालुक्यातील विविध भागात बिबट्या दर्शन देत आहे. तसेच खारेकर्जुने गावातील एका सहा वर्षीय मुलीला कुटुंबियांसमोरुन उललून नेत बिबट्याने ठार केल्याची घटना घडली आहे. निंबळकमध्ये मुलावर हल्ला केला आहे. तसेच वाळकी, गुंडेगाव, खडकी, बाबुर्डी बेंद, सारोळा, घोसपुरी, अकोळनेर परिसरात बिबट्यांनी दर्शन दिले असल्याने नागरिकांमध्ये भितीचे वातावरण आहे. त्यामुळे गावांना दिवसा वीज पुरवठा करण्यात यावा अशी मागणी नगर तालुका कृषी उत्पन्न बाजार समितीचे माजी सभापती अभिलाष घिगे पाटील यांच्या नेतृत्वाखाली खडकी ग्रामपंचायतचे सरपंच भाऊसाहेब बहिरट यांनी केली. दरम्यान कार्यकारी उपअभियंता सपकाळे यांनी तातडीने कार्यवाही करण्याचे आश्वासन दिले.
यंदा समाधानकारक पाऊस झाला आहे. रब्बी हंगामातील पिके चांगली आली आहेत. परंतु, गेल्या काही दिवसांपासून नगर तालुक्यातील अनेक गावांत बिबट्याने दर्शन दिल्याने नागरिकांमध्ये भितीचे वातावरण आहे. वीज पुरवठा रात्री होत असल्याने बिबट्याच्या भीतीमुळे शेतकर्‍यांना पिकांना पाणी देणे शक्य होत नाही. त्यामुळे दिवसा वीज पुरवठा करण्यात यावा अशी करण्यात आली आहे. यावेळी माजी सभापती अभिलाष घिगे, सरपंच भाऊसाहेब बहिरट, सुनिल म्हस्के, संतोष धावडे, नंदू रोकडे उपस्थित होते.
शेतकर्‍यांच्या सोयीसाठी दिवसा वीज पुरवठा करावा ः अभिलाष घिगे
नगर तालुक्यातील अनेक गावांत बिबट्या दिसला आहे. त्यामुळे नागरिकांमध्ये भीतीचे वातावरण तयार झाले आहे. पिके चांगले असूनही शेतीला पाणी देणे अवघड झाले आहे. वाळकी, गुंडेगाव, देऊळगाव सिद्धी, सारोळा कासार, घोसपुरी, अकोलनेर, बाबुर्डी घुमट, खड़की, हिवरे झरे, बाबुर्डी बेंद, या गावांना दिवसा वीज पुरवठा करण्याबाबात कार्यकारी उपअभियंता सपकाळे यांना निवेदन देण्यात आले आहे. याबाबत तातडीने निर्णय होणे अपेक्षित आहे.
दिवसा पूर्ण दाबाने वीज पुरवठा करा ः सरपंच भाऊसाहेब बहिरट
खडकी परिसरात बिबट्यासह वन्य प्राण्यांचा मोठ्या प्रमाणात वावर वाढला आहे. रात्री अपरात्री वन्य प्राणी माणसांवर हल्ले करत आहेत. काहींनी खडकी परिसरात बिबट्या आल्याचे पाहिले आहे. त्यामुळे नागरिकांमध्ये भीतीचे वातावरण आहे. त्यामुळे खडकी गावासाठी दिवसा आठ तास पूर्ण दाबाने वीज पुरवठा करण्यात यावा अशी मागणी सरंपच भाऊसाहेब बहिरट यांनी निवेदनाद्वारे केली आहे.
