अहमदनगर। नगर सहयाद्री:-
नगर-मनमाड राज्य मार्गावर हुंडाई कारचा भीषण अपघात झाला आहे. आज पहाटेच्या सुमारास येवला तालुक्यातील आंबेवाडी येथे घडलेल्या या अपघातात दोन जणांचा मृत्यू झाला आहे, तर एक जण गंभीरपणे जखमी झाला आहे. आकाश रमेश पवार आणि निलेश दगु शेवाळे अशी मयत तरुणांची नावे आहेत. तर चालक शुभम गंगाधर पानमळे गंभीरपणे जखमी झालेला आहे.
हुंडाई कारला अज्ञात वाहनाने पाठीमागून जोरदार धडक दिली, ज्यामुळे कार सुमारे 30 ते 40 फूट लांब रस्त्याच्या कडेला फेकली गेली. अपघातात कारचा अक्षरशः चक्काचूर झाला. चालक आपल्या मित्राला मनमाड रेल्वे स्थानकावर सोडण्यासाठी जात असताना अपघात घडल्याची माहिती समोर आली आहे.
अपघाताची माहिती मिळताच पोलीस घटनास्थळी दाखल झाले आणि जखमीला तातडीने रुग्णालयात उपचारासाठी दाखल करण्यात आले. पोलीस पुढील तपास करत आहेत.
