अहमदनगर। नगर सहयाद्री:-
नगर-कल्याण महामार्गावर भीषण अपघाताची घटना घडली आहे. रविवारी सकाळी सव्वा आठ वाजता लक्झरी बस आणि कारचा भीषण अपघात पिंपळगाव जोगा येथे झाला. या अपघातात चार’ महिलांचा मृत्यू झाला असून काही जण जखमी झाले आहे.
भाग्यश्री साहेबराव गायकर (वय १८, रा. कळंब, ता. अकोले, जि. अ. नगर) व कुसूम मारुती शिंगोटे (वय ५५, ता. बदगी बेलापूर, ता. अकोले, जि. अ. नगर), सविता साहेबराव गायकर (सर्व रा. कळंब) व सुनिता कारभारी हाडवळे (रा. लिंगदेव, ता. अकोले, जि. अ. नगर) अशी मयत महिलांची नावे आहे.
रविवार दि. ४ ऑगस्ट रोजी सकाळी सव्वाआठ वाजण्याच्या सुमारास आळेफाट्यावरून कल्याणच्या दिशेने जाणार्या बसची समोरून येणार्या कारला समोरासमोर धडक झाली. धडक इतकी भीषण होती की कारचा अक्षरश: चुराडा झाला. बस आणि कार रस्त्याच्या बाहेर जाऊन पलटी झाल्या. क्रेनच्या सहाय्याने कार आणि बसला बाहेर काढण्यात आले आहे.
या अपघातात चार महिलांचा जागीच मृत्यू झाला आहे. तर वाहन चालक साहिल साहेबराव गायकर, साहेबराव रामदास गायकर, असे दोघे जखमी झाले आहेत. पुढील तपास पोलीस करत आहे.
