Crime News : एका खासगी शाळेत नववीच्या इयत्तेत शिकणाऱ्या विद्यार्थ्याने आपल्या शिक्षकावर वर्गातच गोळी झाडल्याची धक्कादायक घटना समोर आली आहे. गोळीबारात शिक्षक गगनदीप कोहली गंभीर जखमी झाले असून त्यांच्यावर खासगी रुग्णालयात उपचार सुरु आहेत. कोहली यांची प्रकृती चिंताजनक असल्याची माहिती मिळत आहे.
मिळालेल्या माहितीनुसार, ही घटना २० ऑगस्ट रोजी सकाळी ९.४५ वाजता काशीपूरमधील कुंडेश्वरी रोडवरील एका शाळेत घडली. गगनदीप कोहली हे भौतिकशास्त्राचा तास घेण्यासाठी शाळेत आले होते. तास संपल्यानंतर वर्गातून बाहेर पडत असताना, एका विद्यार्थ्याने जेवणाच्या डब्यात लपवलेले पिस्तूल बाहेर काढले आणि त्यांच्या दिशेने गोळी झाडली. गोळी त्यांच्या उजव्या खांद्याखाली लागल्याचे सांगितले जात आहे.
या प्रकारानंतर विद्यार्थ्याने पळून जाण्याचा प्रयत्न केला, मात्र तत्काळ प्रतिसाद देणाऱ्या इतर शिक्षकांनी त्याला पकडून ठेवले. त्यानंतर जखमी शिक्षकाला तातडीने रुग्णालयात दाखल करण्यात आले. पोलिसांनी सांगितले की, विद्यार्थ्याने रागाच्या भरात हे टोकाचं पाऊल उचलले. काही दिवसांपूर्वी शिक्षकांनी सर्वांसमोर त्याला कानाखाली मारले होते, याचाचा राग त्याच्या मनात होता.
या प्रकरणी अल्पवयीन विद्यार्थ्याविरोधात गुन्हा दाखल करण्यात आला आहे. पुढील चौकशी सुरु असून, शिक्षक गगनदीप कोहली यांना पोलिस संरक्षण देण्यात आल्याचे एएसपी अभय सिंग यांनी स्पष्ट केले आहे.या प्रकारामुळे पालक आणि शिक्षक वर्गात मोठी भीती निर्माण झाली आहे. शाळांमध्ये विद्यार्थ्यांकडून होणाऱ्या हिंसाचाराच्या वाढत्या घटनांवर नियंत्रण मिळवण्यासाठी शैक्षणिक संस्था आणि प्रशासनाने गंभीर पावले उचलण्याची गरज अधोरेखित झाली आहे.
