अहिल्यानगर / नगर सह्याद्री :
जिल्ह्यात होत असलेल्या नगरपरिषद व नगरपंचायत सार्वत्रिक निवडणुका मुक्त, शांततापूर्ण व नि:पक्षपाती वातावरणात पार पाडण्यासाठी तसेच कायदा व सुव्यवस्था सुरळीत राखण्यासाठी मतदानापूर्वीचा दिवस, मतदानाचा दिवस व मतमोजणीचा दिवस या तिन्ही दिवशी ‘कोरडा दिवस’ पाळण्याचे आदेश जिल्हाधिकारी डॉ. पंकज आशिया यांनी जारी केले आहेत.
जिल्ह्यात २ डिसेंबर २०२५ रोजी संगमनेर, कोपरगाव, शिर्डी, राहाता, श्रीरामपूर, देवळाली प्रवरा, राहुरी, शेवगाव, पाथर्डी, जामखेड आणि श्रीगोंदा या ११ नगर परिषदांमध्ये तसेच नेवासा नगरपंचायतीमध्ये मतदान होणार आहे. तर ३ डिसेंबर २०२५ रोजी मतमोजणी पार पडणार आहे. या पार्श्वभूमीवर १ डिसेंबर (मतदानापूर्वीचा दिवस), २ डिसेंबर (मतदानाचा दिवस) आणि ३ डिसेंबर (मतमोजणी पूर्ण होईपर्यंत) सर्व मद्य, ताडी व इतर अबकारी अनुज्ञप्त्या बंद ठेवण्याचे आदेश देण्यात आले आहेत.
या आदेशांचे उल्लंघन करणाऱ्या अनुज्ञप्तीधारकांवर महाराष्ट्र मद्यनिषेध व अबकारी कायद्यानुसार कठोर कारवाई करण्यात येईल, असेही आदेशात स्पष्ट करण्यात आले आहे.
