कुष्ठधाम रोडवर मध्यरात्री मद्यधुंद अवस्थेत धिंगाणा; दोघे जण पोलिसांच्या ताब्यात / सार्वजनिक ठिकाणी गैरवर्तन करणाऱ्या तरुणांवर तोफखाना पोलिसांची कारवाई
अहिल्यानगर / नगर सह्याद्री –
शहरातील कुष्ठधाम रोड परिसरात मध्यरात्रीच्या सुमारास मद्यधुंद अवस्थेत सार्वजनिक ठिकाणी गैरवर्तन करणे दोन तरुणांना चांगलेच महागात पडले आहे. रात्रगस्तीवर असलेल्या तोफखाना पोलिसांच्या पथकाने या दोघांना ताब्यात घेतले असून, त्यांच्याविरुद्ध कायदेशीर कारवाई करण्यात आली आहे.
गणेश जालींदर गायकवाड (वय ३२, रा. उभा मारुती समोर, बोल्हेगाव) आणि पवन वसंत देवतरसे (वय २१, रा. कुंभार गल्ली, नालेगाव) अशी ताब्यात घेतलेल्या संशयित आरोपींची नावे आहेत.
याबाबत अधिक माहिती अशी की, तोफखाना पोलीस ठाण्याचे पथक दिनांक ६ नोव्हेंबर रोजी रात्री गस्तीवर होते. पहाटे सुमारे ०२:१५ वाजता, पोलीस कर्मचारी सतिष शिंदे, पोकॉ सचिन डाके आणि पोसई राजेश दिनकर यांचे पथक प्रोफेसर चौकाकडून कुष्ठधाम रोडने पेट्रोलींग करत होते.
त्यावेळी, बालाजी सँडविच दुकानाच्या शेजारी गणेश गायकवाड व पवन देवतरसे हे त्यांच्या मोटारसायकलजवळ बसलेले पोलिसांना आढळून आले. पोलिसांनी त्यांच्याकडे चौकशी केली असता, दोघांच्याही तोंडाचा आंबट व उग्र वास येत होता. तसेच, त्यांची चाल अडखळत होती व ते असंबद्ध बोलत होते.
पोलिसांनी दोघांनाही ताब्यात घेऊन त्यांची सिव्हिल हॉस्पिटलमध्ये वैद्यकीय तपासणी केली असता, त्यांनी मद्यप्राशन केले असल्याचा प्राथमिक अहवाल डॉक्टरांनी दिला.
सार्वजनिक ठिकाणी नशेच्या अवस्थेत फिरून गैरवर्तवणुक केल्याप्रकरणी, पोलीस कर्मचारी सतिष मारुती शिंदे यांनी सरकारतर्फे फिर्याद दिली आहे. या फिर्यादीवरून दोन्ही आरोपींविरुद्ध तोफखाना पोलीस ठाण्यात गुन्हा दाखल करण्यात आला आहे.
