आयुक्त यशवंत डांगे | २७ नोव्हेंबरपर्यंत हरकतींसाठी मुदत
अहिल्यानगर | नगर सह्याद्री
अहिल्यानगर महानगरपालिका सार्वत्रिक निवडणूक २०२५-२६ साठी विधानसभेच्या मतदार यादीच्या आधारे तयार केलेल्या मतदार याद्या अहिल्यानगर महानगरपालिका क्षेत्रासाठी दिनांक १ जुलै २०२५ रोजी अस्तित्वात असलेली विधानसभेची मतदार यादी महानगरपालिकेच्या प्रभाग क्रमांक १ ते १७ मध्ये विभागून प्रभागनिहाय छापून घेत अधिप्रमाणित केलेली आहे. सदर मतदार याद्या गुरुवार दिनांक २० नोव्हेंबर २०२५ रोजी महानगरपालिका क्षेत्रातील नागरिकांना माहितीसाठी मुख्य प्रशासकीय कार्यालय व महानगरपालिकेच्या संकेतस्थळावर उपलब्ध करण्यात आल्या असल्याची माहिती आयुक्त यशवंत डांगे यांनी दिली.
अहिल्यानगर महानगरपालिकेचे संकेतस्थळ ुुु.राल.र्सेीं.ळप येथे फोटो विरहित मतदार यादी निःशुल्क पहाणेसाठी उपलब्ध आहे. मतदार यादीबाबत हरकती / सूचना असल्यास लेखी स्वरुपात दि.२७ नोव्हेंबर २०२५ पर्यंत महापालिका मुख्य कार्यालय (नविन प्रशासकीय इमारत), प्रभाग समिती कार्यालय क्र. १ सावेडी, प्रभाग समिती कार्यालय क्र. २ शहर, प्रभाग समिती कार्यालय क्र.३ झेंडीगेट, प्रभाग समिती कार्यालय क्र.४ बुरुडगाव या ठिकाणी स्विकारण्यात येतील.
विधानसभेची मतदार यादी महानगरपालिकांच्या प्रभागानुसार विभागून ती महानगरपालिका सार्वत्रिक निवडणुकीकरिता तयार करणे व अधिका-यांनी अधिसूचित करणे या प्रयोजनासाठी दि. १ जुलै, २०२५ हा दिनांक अधिसूचित केला असून, या दिनांकास अस्तित्वात असलेल्या महाराष्ट्र विधानसभेच्या मतदार यादीचे प्रभागनिहाय विभाजन करून अहिल्यानगर महानगरपालिका सार्वत्रिक निवडणुकीकरीता प्रारूप मतदार याद्या तयार करण्यात आल्या आहेत.
राज्य निवडणूक आयोगाच्या आदेशानुसार महानगरपालिका निवडणुकीसाठी प्रभाग क्रमांक १ ते १७ करीता तयार करण्यात आलेल्या प्रभागनिहाय प्रारुप मतदार यादींबाबत काही हरकती व सूचना दाखल करावयाच्या असतील अशा मतदारांनी नमुना अ मध्ये आणि तक्रारदारांनी नमुना ब मध्ये (नमूना अ व ब महानगरपालिकेच्या संकेतस्थळावर प्रसिध्द करण्यात आलेले आहेत.), विहीत कालावधीत हरकती व सूचना दाखल कराव्यात. प्राप्त होणा-या हरकती व सुचनांवर लेखनिकांच्या काही चुका, दुस-या प्रभागातील मतदार चुकून अंतर्भूत झालेले, संबंधित प्रभागातील विधानसभा मतदार यादीत मतदारांची नावे असूनही महानगरपालिकेच्या संबंधित प्रभागाच्या मतदार यादीमध्ये नावे वगळण्यात आली असल्यास अशा मतदारांची नावे मतदार यादीत समाविष्ट करणे, मृत व्यक्तींची नावे आढळल्यास किंवा त्याबाबत हरकती किंवा सूचना प्राप्त झाल्यास अशा सुधारणा / दुरूस्ती करता येतील.
