डॉ. बाबासाहेब आंबेडकर पूर्णाकृती पुतळ्याचे रविवारी अनावरण; कोण कोण राहणार उपस्थित पहा

मार्केट यार्ड चौक येथे महानगरपालिकेच्या वतीने भव्य कार्यक्रमाचे आयोजन / कार्यक्रमाच्या पार्श्वभूमीवर वाहतुकीच्या मार्गात पोलिस प्रशासनाकडून बदल
अहिल्यानगर । नगर सह्याद्री
शहरातील मार्केटयार्ड चौक येथील महामानव भारतरत्न डॉ. बाबासाहेब आंबेडकर यांच्या पूर्णाकृती पुतळ्याचे अनावरण व माळीवाडा वेस येथे क्रांतीसुर्य महात्मा जोतीराव फुले, क्रांतीज्योती सावित्रीबाई फुले यांच्या पूर्णाकृती पुतळ्यासाठी चबुतरा उभारणे, परिसराचे सुशोभीकरणाचे भूमिपूजन २७ जुलै रोजी राज्याचे उपमुख्यमंत्री अजित पवार व विधान परिषदेचे सभापती प्रा. राम शिंदे यांच्या हस्ते होणार असल्याची माहिती महानगरपालिकेचे आयुक्त तथा प्रशासक यशवंत डांगे यांनी दिली. या सोहळ्यास उपस्थित रहावे, असे आवाहन स्वागताध्यक्ष तथा शहराचे आमदार संग्राम जगताप यांनी केले आहे.

राज्याचे जलसंपदा मंत्री राधाकृष्ण विखे पाटील यांच्या प्रमुख उपस्थितीत होणाऱ्या या अनावरण सोहळ्यास खासदार निलेश लंके, आमदार किशोर दराडे, आमदार सत्यजीत तांबे, आमदार शिवाजीराव गर्जे, माजी खासदार डॉ. सुजयदादा विखे पाटील, जिल्हाधिकारी डॉ. पंकज आशीया, जिल्हा परिषदेचे मुख्य कार्यकारी अधिकारी आनंद भंडारी, पोलिस अधीक्षक सोमनाथ घार्गे आणि अनुसूचित जाती-जमाती आयोगाचे सचिव गोरक्ष लोखंडे आदी मान्यवर उपस्थित राहणार आहेत. तसेच, महाथेरो जगप्रसिद्ध भंते, विपश्यनाचार्य मा. डॉ. राहूल बोधी, सुप्रसिद्ध गायक आनंद शिंदे हेही सन्माननीय मान्यवर म्हणून उपस्थित राहणार आहेत.

महानगरपालिकेकडून मार्केटयार्ड चौक येथे भव्य कार्यक्रमाचे आयोजन करण्यात येणार आहे. कार्यक्रमासाठी होणारी गर्दी लक्षात घेता मार्केटयार्ड येथील वाहतूक अन्य मार्गाने वळवण्यात आली आहे. चांदणी चौक, मार्केट यार्ड चौक मार्गे पुणेकडे जाणारी सर्व वाहने कोठी चौक – महात्मा फुले चौक चाणक्य चौक – सक्कर चौकमार्गे जातील. तसेच, पुणेकडून सक्कर चौक – माळीवाडा मार्केटयार्डमार्गे छत्रपती संभाजीनगरकडे जाणारी वाहने सक्कर चौक – चाणक्य चौक – महात्मा फुले चौक – कोठी चौकमार्गे जातील. पोलिस अधीक्षक सोमनाथ घार्गे यांनी याबाबत आदेश जारी केले आहेत.

अहिल्यानगरवासियांनी, सर्व आंबेडकर प्रेमी नागरिकांनी या कार्यक्रमाला उपस्थित रहावे, असे आवाहन महानगरपालिकेचे आयुक्त मा. यशवंत डांगे, उपायुक्त मा. संतोष टेंगले, मा. विजयकुमार मुंडे, जल अभियंता परिमल निकम, शहर अभियंता मनोज पारखे आणि उप अभियंता श्रीकांत निंबाळकर, तसेच डॉ . बाबासाहेब आंबेडकर पूर्णाकृती पुतळा समिती, महात्मा फुले पूर्णाकृती पुतळा समितीच्या वतीने करण्यात आले आहे.

दरम्यान मार्केट यार्ड चौकातील डॉक्टर बाबासाहेब आंबेडकर यांच्या पूर्ण कृती पुतळ्याचे अनावरण होत असून त्याच्या तयारीची पाहणी शनिवारी आमदार संग्राम जगताप, आयुक्त यशवंत डांगे व पुतळा समितीचे कार्यकर्ते यांनी केली.

फुले दांम्पत्यांच्या पुतळा उभारणीच्या भूमिपूजन कार्यक्रम स्थळाची आमदार जगताप यांच्याकडून पहाणी
शहरातील माळीवाडा वेस येथे उभारण्यात येणाऱ्या महात्मा फुले व सावित्रीबाई फुले यांच्या एकत्रित पुतळा उभारणीसाठी चौथऱ्याचे व सुशोभीकरणाचे भूमिपूजन रविवारी (दि.27 जुलै) राज्याचे उपमुख्यमंत्री अजित पवार यांच्या हस्ते व पालकमंत्री राधाकृष्ण विखे पाटील यांच्या अध्यक्षतेखाली विविध मान्यवरांच्या उपस्थितीत कार्यक्रम होणार आहे. या पार्श्‍वभूमीवर शनिवारी आमदार संग्राम जगताप यांनी माळीवाडा येथील कार्यक्रम स्थळाची पहाणी केली.
आमदार जगताप यांनी रविवारी होणाऱ्या भूमिपूजनचा कार्यक्रम सोहळा दिमाखदार होण्यासाठी महापालिका अधिकारी व महात्मा फुले व सावित्रीबाई फुले कृती समितीच्या पदाधिकाऱ्यांना सूचना केल्या. तर सर्व समाज बांधवांना कार्यक्रमास सहभागी होण्याचे आवाहन केले. यावेळी मनपा आयुक्त यशवंत डांगे, महात्मा फुले व सावित्रीबाई फुले कृती समितीचे अध्यक्ष प्रा. माणिक विधाते, सकल माळी समाजाचे अध्यक्ष किशोर डागवाले, उपाध्यक्ष बाळासाहेब भुजबळ, कृती समितीचे सचिव अशोक कानडे, हमाल पंचायतचे अध्यक्ष अविनाश घुले, ज्ञानेश्‍वर रासकर, श्री विशाल गणेश देवस्थानचे उपाध्यक्ष पंडितराव खरपुडे, फुले ब्रिगेडचे दीपक खेडकर, भरत गारुडकर, मळू गाडळकर, राहुल रासकर, राहुल बोरुडे, विष्णुपंत म्हस्के, जल अभियंता परिमल निकम, शहर अभियंता मनोज पारखे, उप अभियंता श्रीकांत निंबाळकर, अशोक गायकवाड, सुरेश बनसोडे, अमित काळे, मनिष साठे, अजय साळवे आदी उपस्थित होते.
प्रा. माणिक विधाते म्हणाले की, रविवारी सायंकाळी 5 वाजता हा कार्यक्रम होणार आहे. महात्मा फुले व सावित्रीबाई फुले यांचा एकत्रित पूर्णाकृती पुतळा उभारणीसाठी आमदार संग्राम जगताप यांचे महत्त्वाचे योगदान राहिले आहे. ही वास्तविक स्व. अरुणकाका जगताप यांची संकल्पना होती. 13 नोव्हेंबर 2022 पासून याबाबत पाठपुरावा सुरु होता. या कामाला मूर्त स्वरुप येत आहे. हा पुतळा सर्व समाजाला प्रेरणा देण्याच्या उद्देशाने उभा राहत आहे. या कार्यक्रमात सर्वांनी सहभागी होण्याचे त्यांनी सांगितले.