अहिल्यानगर | नगर सह्याद्री
घटस्फोटाचा दावा दाखल केल्याच्या नोटिसीमुळे संतापलेल्या पतीने आपल्या पत्नीचे आणि तिच्या आईचे चारचाकी वाहनातून अपहरण केले. त्यानंतर पत्नीचा गळा दाबून खून करण्याचा प्रयत्न केल्याची खळबळजनक घटना सोलापूर महामार्गावरील दरेवाडी परिसरात शुक्रवारी (दि. २८) घडली. याप्रकरणी दोघांना पोलिसांनी दोन तासांच्या आत अटक केली आहे. या प्रकरणी पतीसह एकूण तीन आरोपींविरुद्ध भिंगार कॅम्प पोलिस ठाण्यात गुन्हा दाखल करण्यात आला आहे.
चेतना कॉलनी, एमआयडीसी येथील रहिवासी असलेल्या २२ वर्षीय पीडित महिलेने आपल्या पतीविरुद्ध न्यायालयात घटस्फोटासाठी अर्ज केला आहे. याच अर्जाची नोटीस आरोपी पतीला मिळाल्याने हा सर्व प्रकार घडला. शुक्रवारी दुपारी १ वाजण्याच्या सुमारास, पीडित महिला व तिची आई मोपेड गाडीवरून जात असताना आरोपी पती ऋषिकेश मोरे व त्याचे दोन साथीदार (रोहन पवार, सीमा पवार) पांढर्‍या रंगाच्या बलेनो गाडीतून आले. त्यांनी दोन्ही महिलांना बळजबरीने गाडीत बसवून त्यांचे अपहरण केले. अपहरणादरम्यान आरोपी पतीने पत्नीचा गळा दाबून तिला जीवे मारण्याचा प्रयत्न केला.
यासोबतच, आरोपींनी साक्षीदार आईला शिवीगाळ करून कुटुंबालाही ठार मारण्याची धमकी दिली. भिंगार कॅम्प पोलिसांनी आरोपींविरुद्ध भारतीय दंड विधान संहितेनुसार खुनाच्या प्रयत्नासह, अपहरणाचे गंभीर गुन्हे दाखल केले आहेत. पुढील तपास सहाय्यक पोलिस निरीक्षक जगदीश मुलगीर हे करत आहेत.
