मुंबई। नगर सहयाद्री:-
कर्जतमधील घरकुलप्रश्नी आमदार रोहित पवार यांनी मुख्यमंत्री एकनाथ शिंदे यांची भेट घेतली. राजीव गांधीनगर, सिद्धार्थनगर, यासीननगर, अक्काबाईनगर, अण्णा भाऊ साठेनगर आणि लहुजीनगर येथील २६७ रहिवाश्यांना ‘रमाई आवास योजने’ अंतर्गत (शहरी क्षेत्र) घरकुल बांधण्याचा मार्ग मोकळा झाला असून, मागील तीन वर्षांच्या मालमत्ता पावतीच्या आधारे त्यांना घरकुल बांधण्यास परवानगी मिळणार आहे. यासंदर्भात आमदार रोहित पवार यांच्या पाठपुराव्यानुसार जिल्हाधिकाऱ्यांनी पाठवलेल्या प्रस्तावास राज्य सरकारने मंजुरी दिली आहे. याचा कर्जत शहरात शासकीय जागेत राहणाऱ्या अघोषित झोपडपट्टीधारकांना फायदा होणार आहे.
शहरात आज नगरपंचायत असली, तरी ग्रामपंचायत काळापासून राजीव गांधीनगर, सिद्धार्थनगर,यासीननगर, अक्काबाईनगर, अण्णाभाऊ साठेनगर आणि लहुजीनगर या भागात शासकीय जागेत अनेक कुटुंबे राहतात. यापैकी अनुसूचित जाती व नवबौद्ध घटकांतील २६७ रहिवाश्यांना रमाई आवास योजनेअंतर्गत घरकुल मंजूर असूनही तांत्रिक कारणांनी त्यांना घरकुल बांधण्यास नगरपंचायतकडून परवानगी मिळत नव्हती. नगरपंचायतीकडे बांधकाम परवानगीसाठी आलेले ९१ प्रस्ताव गेल्या अनेक वर्षांपासून प्रलंबित होते. त्यांना मंजुरी मिळत नसल्याने या कुटुंबांना हक्काच्या घरकुलापासून वंचित राहावे लागत होते. त्यामुळे या कुटुंबांकडून आंदोलनही करण्यात आले होते.
ही सर्व कुटुंबे कर्जत ग्रामपंचायत असतानाच्या काळापासून शासकीय जागेत रहात असल्याने या झोपडपट्टीधारकांनाही घरकुलाचा लाभ मिळण्यासाठी मार्ग काढण्याची विनंती आमदार रोहित पवार यांनी केली होती. याबाबत जिल्हाधिकाऱ्यांशी त्यांनी सविस्तर चर्चा केली होती, तसेच मुख्यमंत्री एकनाथ शिंदे यांचीही
याप्रश्नी भेट घेऊन त्यांच्याकडेही याबाबत पाठपुरावा केला आणि हा प्रश्न त्यांनी विधानसभेच्या अधिवेशनातही उपस्थित केला होता.
केलेल्या पाठपुराव्याला यश
पात्र असूनही माझ्या मतदारसंघातील अनेक कुटुंबांना हक्काच्या घरकुलापासून वंचित रहावे लागले होते. परंतु याबाबत केलेल्या पाठपुराव्याला यश आले आणि याचा माझ्या मतदारसंघासोबतच राज्यातील इतरही गरीब कुटुंबांना फायदा होणार आहे.
रोहित पवार, आमदार
