अहमदनगर। नगर सहयाद्री
भावाला शिवीगाळ केल्याचा राग मनात धरून एका युवकाने दुसर्‍या युवकावर चॉपरने वार करून त्याचा खून केल्याची धक्कादायक घटना एमआयडीसीतील दूध डेअरी चौकात मकरसंक्रांतीच्या दिवशी सायंकाळी घडली. शुभम अशोक सोनवणे (वय २४ रा. नवनागापूर) असे खून झालेल्याचे नाव आहे.
बंटी ऊर्फ किरण प्रकाश पाटोळे (रा. दूध डेअरी चौक) याचा भाऊ रोहित पाटोळे सोमवारी सायंकाळी एमआयडीसीतील दूध डेअरी चौकात गेला होता. तेथे असलेल्या शुभम सोनवणे सोबत त्याचे वाद झाले. याची माहिती रोहितने बंटी पाटोळे याला दिली. बंटी याने चॉपर सोबत घेत दूध डेअरी चौक गाठला. रोहित सोबत वाद घालून त्याला शिवीगाळ केल्याचा राग मनात धरून बंटी याने शुभम सोनवणे यांच्यावर चॉपरने सपासप वार करून त्याला गंभीर जखमी केले.
जखमी शुभम सोनवणे यांना स्थानिकांनी विळद घाटातील रुग्णालयात दाखल केले. तेथे त्याला डॉटरांनी मृत घोषित केले. मारहाण करणारा बंटी पाटोळे देखील जखमी झाला असून त्याच्यावर रूग्णालयात उपचार सुरू आहेत.
घटनेची माहिती मिळताच अपर पोलीस अधीक्षक प्रशांत खैरे, पोलीस उपअधीक्षक संपत भोसले, एमआयडीसी पोलीस ठाण्याचे सहायक पोलीस निरीक्षक राजेंद्र सानप यांच्यासह स्थानिक गुन्हे शाखेचे सहायक पोलीस निरीक्षक हेमंत थोरात यांनी रूग्णालयात धाव घेतली.
