अहिल्यानगर । नगर सहयाद्री:-
भाजपने संपूर्ण राज्यात मोठ्या प्रमाणावर सदस्य नोंदणी अभियान सुरू केले असून, या अभियानात पक्षाचे नेते आणि विधान परिषदचे सभापती राम शिंदे यांनी मोठा वाटा उचलला आहे. त्यांनी स्वतःच्या प्रयत्नातून तब्बल १००० नवीन सदस्यांची नोंदणी यशस्वीरीत्या पूर्ण केली असल्याची माहिती ट्विटद्वारे दिली आहे. भाजपच्या विचारधारेचा अधिकाधिक नागरिकांना भाग बनवण्यासाठी हा प्रयत्न असल्याचे त्यांनी नमूद केले आहे.
राम शिंदे यांनी आपल्या ट्विटमध्ये स्पष्टपणे सांगितले की, भाजप हा केवळ एक पक्ष नाही, तर तो राष्ट्र उभारणीचा एक संकल्प आहे. अधिकाधिक नागरिकांना या विचारधारेचा भाग बनवण्यासाठी आपण सर्वांनी एकजुटीने कार्य केले पाहिजे.” त्यांच्या या वक्तव्यावरून पक्षविस्तारासाठी त्यांनी घेतलेला पुढाकार दिसून येतो. नव्या सदस्यांनी भाजपच्या विचारधारेवर विश्वास ठेवत पक्षात प्रवेश केला असल्याचेही त्यांनी नमूद केले.
नवीन सदस्य नोंदणी पूर्ण केल्यानंतर राम शिंदे यांनी भाजप परिवारात सामील झालेल्या सर्व नव्या सदस्यांचे मनःपूर्वक स्वागत केले. या अभियानामुळे पक्ष संघटनेची ताकद वाढेल आणि भविष्यातील राजकीय समीकरणांवर याचा प्रभाव पडू शकतो. राज्यभरातील भाजप कार्यकर्त्यांनीही या सदस्य नोंदणी अभियानात उत्स्फूर्त सहभाग घेतला आहे.
अभियानामुळे पक्ष संघटनेला नवसंजीवनी मिळणार
राम शिंदे हे कर्जत जामखेड विधानसभा मतदारसंघाचे आमदार राहिले असून, मागील निवडणुकीत त्यांचा थोडक्यात पराभव झाला होता. मात्र, पक्षाने त्यांच्या योगदानाची दखल घेत विधान परिषदेचे सभापती म्हणून त्यांची निवड केली. त्यांच्या राजकीय कारकिर्दीतील हा एक महत्त्वाचा टप्पा असून, पक्षासाठी त्यांनी घेतलेल्या मेहनतीचे हे फळ असल्याचे राजकीय विश्लेषक मानत आहेत. दरम्यान, भाजपच्या या सदस्य नोंदणी अभियानामुळे पक्ष संघटनेला नवसंजीवनी मिळेल, असे मानले जात आहे. पक्षातील नव्या कार्यकर्त्यांचा सक्रिय सहभाग वाढल्यास आगामी निवडणुकांमध्ये त्याचा फायदा होऊ शकतो.
