जळगाव / नगर सह्याद्री –
जळगावमध्ये माजी उपसरपंचाची निर्घृण हत्या करण्यात आली आहे. जळगावजवळील कानसवाडा गावामध्ये ही घटना घडली. माजी उपसरपंचाची दिवसाढवळ्या चॉपर आणि चाकूने भोसकून हत्या करण्यात आली. प्रत्यक्षदर्शींनी याबाबत पोलिसांना माहिती दिली. युवराज सोपान कोळी असं हत्या झालेल्या उपसरपंचाचे नाव आहे. याप्रकरणाचा तपास जळगाव पोलिसांकडून सुरू आहे.
मिळालेल्या माहितीनुसार, जळगाव येथील कानसवाडा गावचे माजी उपसरपंच युवराज कोळी यांची निर्घृण हत्या करण्यात आली. शुक्रवारी सकाळी ही घटना घडली. या घटनेमुळे परिसरात खळबळ उडाली. युवराज कोळी हे शिवसेना शिंदे गटाचे माजी उपसरपंच असल्याची माहिती गावकऱ्यांनी दिली. गावातीलच ३ जणांनी त्यांची हत्या केली.
कानसवाडा गावातीलच तिघांनी आज सकाळी ८ च्या सुमारास युवराज कोळी यांच्यावर धारधार शस्त्रांनी हल्ला केला. चाकू आणि चॉपरने त्यांच्यावर सपासप वार करण्यात आले. या हल्ल्यात गंभीर जखमी झालेल्या युवराज कोळी यांचा अतिरक्तस्राव झाल्यामुळे जागीच मृत्यू झाला. जळगाव शासकीय व वैद्यकीय महाविद्यालयात युवराज कोळी यांचा मृतदेह शवविच्छेदनासाठी आणण्यात आला आहे.
रुग्णालयाबाहेर युवराज कोळी यांच्या नातेवाईकांनी प्रचंड आक्रोश केला आहे. कानसवाडा गावासह जिल्हा रुग्णालयात तणावाचे वातावरण आहे. युवराज कोळी यांची हत्या का केली? यामागचे नेमके कारण समोर आले नाही. युवराज कोळी यांच्या हत्येनंतर तिन्ही मारेकरी फरार झाले आहेत. पोलिसांनी त्यांच्याविरोधात गुन्हा दाखल केला असून त्यांच्या शोधासाठी पथके रवाना केली आहेत.
