मुंबई । नगर सहयाद्री:-
राज्यातील विधानसभा निवडणुकीसाठी राज्यात आचारसंहिता लागली आहे. भाजपने ९९ उमेदवारांची घोषणा करुन सरशी घेतली आहे. उमदेवारांच्या पहिल्या यादीत अहिल्यानगर जिल्ह्यातील पाच उमेदवारांचा समावेश केला आहे. तर महाविकास आघाडीत अजून काही जागांवर तिढा कायम असल्याचे दिसून येत आहे.
दरम्यान आगामी विधानसभा निवडणुकीच्या पार्श्वभूमीवर राज्यात गेल्या काही दिवसांपासून मोठ्या घडामोडी घडत असून आता नाशिक पदवीधर मतदारसंघाचे आमदार सत्यजित तांबेअचानक उपमुख्यमंत्री देवेंद्र फडणवीस यांच्या भेटीसाठी दाखल झाले आहे. यामुळे राजकीय वर्तुळात चर्चांना उधाण आले आहे.
एका कार्यक्रमात देवेंद्र फडणवीस यांनी सत्यजित तांबे यांच्यावर आपली नजर असल्याचे म्हटले होते. सत्यजित तांबे यांच्यासारखे नेते तुम्ही किती दिवस बाहेर ठेवणार, अशी लोक जास्त दिवस बाहेर ठेवली की, आमची नजर त्यांच्याकडे जाते. आम्ही चांगली माणसं गोळा करत आहोत, असे म्हणत देवेंद्र फडणवीस यांनी सत्यजित तांबे यांच्याबाबत वक्तव्य केले होते.
यानंतर सत्यजित तांबे यांना भाजपने छुपा पाठींबा दिल्याची चर्चा होती. सत्यजित तांबे यांनी नाशिक पदवीधर निवडणुकीत दणदणीत विजय मिळवला. आता आमदार सत्यजित तांबे अचानक उपमुख्यमंत्री देवेंद्र फडणवीसांच्या भेटीसाठी दाखल झाले आहेत. भेटीत नेमकी काय चर्चा झाली? याकडे आता सर्वांचे कान लागले आहे.
