संगमनेर । नगर सहयाद्री-
अकोल्यातील घटनेने संपूर्ण महाराष्ट्र हळहळला होता आता. पुन्हा दोन मुलांचा प्रवरा नदीपात्रात पाण्यात बुडून मृत्यू झाल्याने हळहळ व्यक्त करत आहे. गंगामाई घाटावर दोन विद्यार्थी पोहण्यासाठी गेले असता त्यांचा पाण्यात बुडून मृत्यू झाल्याची दुर्दैवी घटना घडली आहे. आदित्य रामनाथ मोरे (वय १७, रा. घुलेवाडी, ता. संगमनेर) व श्रीपाद सुरेश काळे (वय १७, रा. कोळवाडे, ता. संगमनेर) असे मयत मुलांचे नाव आहे.
शुक्रवारी (दि.२४ मे) सायंकाळी साडेपाच वाजेच्या सुमारास ही घटना घडली. आदित्य व श्रीपाद हे दोघे शिक्षण घेत होते. ते महाविद्यालयीन मित्रांसोबत एकत्रितपणे दुपारच्यावेळी घुलेवाडी परिसरात बसले होते. मित्रांनी मिळून प्रवरा नदीवर पोहायला जाण्याचा निर्णय घेतला.
शरीर थंड करण्यासाठी त्यांनी नदीत उड्या घेतल्या. यावेळी त्यांना पाण्याचा फारसा ठाव लागला नाही. दरम्यान, सर्व मित्र कडेला पोहत होते. मात्र, आदित्य व श्रीपाद हे खड्ड्याकडे गेले एका ठिकाणी खोल गर्त्यात सापडले.
जेव्हा या दोघांच्या नाकातोंडात पाणी जायला सुरूवात झाली तेव्हा त्यांनी गटांगळ्या खाल्ल्या. वाचवा, वाचवा म्हणून आवाज देखील दिला. मात्र, ठाव न लागल्याने दोघांना पुरेसा श्वास घेता आला नाही.त्यामुळे दोघांना मृत्यूला सामोरे जावे लागले.
