जामखेड । नगर सहयाद्री:-
जामखेड तालुक्यातील नान्नज गावात किरकोळ कारणावरून एका तरुणाला तिघांनी लाकडी ठोकळ्याने जबर मारहाण करून गंभीर जखमी केल्याची धक्कादायक घटना घडली आहे. ही घटना 17 जून 2025 रोजी सायंकाळी सहा वाजता घडली असून, घटनेचे सीसीटीव्ही फुटेजही समोर आले आहे. विक्रम बबन कोळी (रा. पोतेवाडी, ता. जामखेड) हा नान्नज येथील एका हॉटेलमध्ये आपल्या भावाची वाट पाहत थांबला होता. पाणी घेण्यासाठी गेल्यानंतर त्याचा पाय चुकून तिथे बसलेल्या सोमनाथ मोहळकर याला लागला. यावरून किरकोळ वाद निर्माण होऊन, सोमनाथने विक्रमला “तुला दाखवतो” म्हणत धमकी दिली.
विक्रम हॉटेलबाहेर आल्यावर सोमनाथ मोहळकर, आदिल शेख आणि छोट्या शेख यांनी त्याला घेरले. तिघांनी मिळून त्याला शिवीगाळ करत लाथाबुक्क्यांनी मारहाण सुरू केली. यावेळी छोट्या शेख याने मटण तोडण्यासाठी वापरला जाणारा लाकडी ठोकळा विक्रमच्या डोक्यावर फेकून मारला, त्यामुळे तो गंभीर जखमी झाला. विक्रमचा भाऊ रमेश कोळी याने भांडण थांबवण्याचा प्रयत्न केला असता, त्यालाही सोमनाथ मोहळकरने मारहाण केली. आदिल शेख व छोट्या शेख यांनीही रमेशला शिवीगाळ करून, “आमच्या नादी लागलात तर संपवून टाकू, अशी धमकी दिली.
या प्रकरणी विक्रम कोळी याच्या तक्रारीवरून सोमनाथ मोहळकर, आदिल शेख आणि छोट्या शेख (सर्व रा. नान्नज) यांच्याविरुद्ध जामखेड पोलीस ठाण्यात गुन्हा दाखल करण्यात आला आहे. तपास पोलीस निरीक्षक दशरथ चौधरी यांच्या मार्गदर्शनाखाली हेड कॉन्स्टेबल एस. डी. लोंखडे करत आहेत. जखमीच्या नातेवाइकांनी पोलिसांना निवेदन देत आरोपींना तातडीने अटक करून योग्य कलमांतर्गत कठोर कारवाई करण्याची मागणी केली आहे. ही घटना सार्वजनिक ठिकाणी घडल्याने आणि सीसीटीव्ही फुटेज समोर आल्याने गावात तणावाचे वातावरण निर्माण झाले आहे. स्थानिक नागरिकांनी देखील या प्रकरणात त्वरीत आणि कडक कारवाई करण्याची मागणी केली आहे.
