श्रीगोंदा | नगर सह्याद्री
श्रीगोंदा तालुक्यातील सोनवणे वस्ती येथे अवैध जुगार अड्ड्यावर विशेष पोलिस पथकाने छापा टाकून 37 लाख 58 हजार 300 रुपये किमतीचा मुद्देमाल जप्त केला. याप्रकरणी स्वप्नील राजू खेत्रे यांच्यासह 22 जणांना अटक करण्यात आली. तर दोघे फरार झाले. परिविक्षाधीन पोलीस उपअधीक्षक संतोष खाडे यांच्या नेतृत्वात ही कारवाई झाली. पोलिस अधीक्षक सोमनाथ घार्गे यांच्या आदेशानुसार अवैध धंद्यांविरुद्ध कारवाईसाठी विशेष पथक स्थापन करण्यात आले.
24 जून रोजी श्रीगोंदा पोलीस स्टेशन हद्दीत पेट्रोलिंगदरम्यान खाडे यांना गुप्त बातमीदारामार्फत माहिती मिळाली की, स्वप्नील खेत्रे हा सोनवणे वस्तीजवळ हेमंत कोथिंबिरे यांच्या शेडमध्ये तिरट जुगार खेळवतो. पथकाने पंचांसह छापा टाकला असता, 22 जण पत्ते आणि पैशांसह जुगार खेळताना आढळले. पोलिसांना पाहताच काही जण पळाले, परंतु 22 जणांना ताब्यात घेण्यात आले.
अंगझडतीत 2 लाख 22 हजार 800 रुपये रोख, 5 लाख 96 हजार 000 रुपये किमतीचे 20 मोबाईल आणि 28 लाख 90 हजार रुपये किमतीची 9 वाहने जप्त केली. याप्रकरणी श्रीगोंदा पोलीस स्टेशनात महाराष्ट्र जुगार कायदा कलम 4, 5 अन्वये गुन्हा नोंदवला गेला. फरार दिपक मखरे आणि हेमंत कोथिंबिरे यांचा शोध सुरू आहे.
त्याचवेळी, जामखेड पोलीस स्टेशन हद्दीत नगर-जामखेड रोडवरील हॉटेल कृष्णा येथे अवैध दारूविक्रीप्रकरणी तुकाराम रामराव डोले (वय 42, रा. सारोळा) याला अटक करण्यात आली. त्याच्याकडून 19 हजार रुपये किमतीचा विदेशी दारू आणि बिअरचा साठा जप्त करण्यात आला. जामखेड पोलीस स्टेशनला गुन्हा दाखल करण्यात आला.
