श्रीगोंदा नगरपरिषद / आघाडीचा चेहरा दिसत असला तरी त्यांनी उभे केलेले ‘जुगाड’ ही पाचपुते पिता-पुत्रांचीच खेळी
आप्पा चव्हाण | नगर सह्याद्री
श्रीगोंदा नगरपरिषद निवडणूकीतील बाबासाहेब भोस यांच्या सुनबाईंची उमेदवारी आ.पाचपुते यांच्याकडून पुरस्कृत झाली असल्याचे समोर आले आहे. बाबासाहेब भोस यांनी लोकेच्छेविरुध्द भूमिका घेत अट्टाहासाने लंगडा पॅनल केला हेही लपून राहिलेले नाही. भोस हा आघाडीचा चेहरा दिसत असला व तसे ते दाखवित असले तरी त्यांचा ’धनी’ वेगळाच आहे. त्यांनी उभे केलेले ‘जुगाड’ ही पाचपुते पिता पुत्रांचीच खेळी आहे. नगरपरिषद निवडणूकीत मनोहर पोटेंना मिळणारी मते भोस यांनी घ्यायची आणि त्याबदल्यात पाचपुतेंच्या खेतमाळीस यांचा विजयाचा मार्ग मोकळा करण्याचा डाव टाकला गेलाय. म्हणजेच पोटे यांना पराभूत करण्याची ‘सुपारी’ घेतली गेली हे स्पष्ट आहे. १९७९ पासून ते आजपर्यंतचे त्यांचे राजकीय रेकॉर्ड असेच राहिले आहे. त्यांचा कर्ताकरविता प्रत्येक निवडणुकीत वेगळाच राहिला हेही लपून राहिलेले नाही. संपूर्ण शहरालाच नव्हे तर तालुयाला आता राजकारणातली ‘भोस नीती’ कळून चुकली आहे.
जिल्ह्यातील दिग्गजांनी ताकद दिली, तरीही त्यांना फसवणारे हेच ते भोस!
जिल्ह्यातील जवळपास सर्वच जेष्ठ नेत्यांनी भोस यांना नेहमीच मदतीची भूमिका घेतली. पण भोस फक्त ’अर्थ’शोधाचे लाभ घेत राहिले. जिल्ह्यातील बाळासाहेब विखे पाटलांपासून ते शंकरराव काळे, आबासाहेब निबाळकर, यशवंतराव गडाख, बाळासाहेब थोरात, मारुतराव घुले, आप्पासाहेब राजळे, मधुकरराव पिचड, गोविंदराव आदिक, शिवाजीराव नागवडे, कुंडलिकराव जगताप या मातब्बर नेत्यांनी उदार भावनेतून भोस यांना सातत्याने मदत केली.मात्र भोस यांनी या सर्वांना फसवले. भोस हे कधीच कोणा नेत्याबरोबर जसे ठाम व विश्वासाने राहिले नाहीत तसेच त्यांनी कोणत्याच कार्यकर्त्याला ताकद देण्याचे कामही केले नसल्याचे सर्वश्रूत आहे.
कार्यकर्त्यांना वार्‍यावर सोडणारे भोस!
जिल्हा परिषदेेचे माजी अध्यक्ष राहिलेले बाबासाहेब भोस हे १९८० पासून श्रीगोंदा शहरात आहेत. आतापर्यंत त्यांची १९७९ पासूनची प्रत्येक निवडणूक लोकवर्गणीतून झाली. त्यांच्यासाठी ज्यांनी ज्यांनी वर्गणी जमा केली ते सारे आता त्यांच्यासोबत का नाहीत? ते एक तर लयाला गेले, देशोधडीला लागले! जुन्यांपैकी आज त्यांच्यासोबत कोण आहेत? विजय मचे, बापू गोरे, किसन बोरुडे, बापू खेतमाळीस, भाऊ खेतमाळीस, विजू पाटील बाळू गांधी, प्रदीप वैद्य, माणिक निंबाळकर, फक्कड मोटे, सतीश मखरे, रमेश मखरे ही नावे वानगीदाखल आहेत. या सार्‍यांना काहीच मिळाले नाही. मात्र, बाबासाहेब भोस कायम फायद्यात राहिले. घोगरगाव ग्रामपंचायत ते लोकसभा अशा सार्‍या निवडणुका लढवताना सहकारातील साखर कारखाना निवडणूक बाबासाहेब भोस यांनी केली. ज्या कार्यकर्त्यांच्या जीवावर त्यांनी या निवडणुका केल्या, त्यांना त्यांनी कायम निवडणुकीनंतर वार्‍यावर सोडले.
‘सुपारी’ वाजवायचीच ही भोस यांची खासीयत
बाबासाहेब भोस यांनी कोणाच्या तरी इशार्‍यावरुनच पाडापाडीचे राजकारण केले नाही अशी एकही निवडणूक झाली नाही. यासाठी कधी स्वत:, कधी प्यादे तर कधी कुटूंबातील सदस्यांची उमेदवारी करुन ’सुपारी’ वाजवायचीच ही भोस यांची खासीयत. सन २००४ व २००९ च्या विधानसभा निवडणूकीतही भोस यांनी त्यांचा ‘सुपारी फॉर्म्युला’ यशस्वीपणे राबविला होता हे आजही कोणी विसरलेले नाही.
राहुल जगतापांची साथ सोडून मशालीत गेलेले हेच ते भोस!
मागील म्हणजेच सन २०२४ च्या विधानसभा निवडणूकीत सुरुवातीला राहूल जगताप यांच्या बाजूने कल असलेले बाबासाहेब भोस ‘मशाली’ सोबत कसे आणि का गेले हे श्रीगोंदेकर विसरलेले नाहीत. सन १९८० पासून श्रीगोंदा शहरात वास्तव्यास असलेल्या भोस यांना शहराने खूप काही दिले. मात्र, शहर विकासात योगदान देण्याचा त्यांना कायम विसर पडला.
महाविकास आघाडी नव्हे पाचपुतेंची ‘बी टीम’ हीच ओळख!
नगरपरिषद निवडणूकीत बाबासाहेब भोस यांनी महाविकास आघाडीचा ‘खेळ’ ऊभा केल्याचे ते भासवित असले तरी हा ‘खेळ’ पाचपुते पुरस्कृतच असल्याचे स्पष्टपणे समोर आले आहे. नगरपरिषद निवडणूकीत मनोहर पोटेंना रोखण्यासाठी राबणारी पाचपुतेंची ‘बी टीम’ हीच भोस यांच्या पॅनलची खासीयत झाली आहे. सरळ निवडणुकीत मनोहर पोटे पराभूत होणार नाहीत हे स्पष्ट असल्याने मतविभागणी होण्यासाठी पाचपुतेंनी भोस यांचे ‘दुकान’ या निवडणुकीत ‘सुपारी’ देवून थाटले हे आता लपून राहिलेले नाही.
सत्तेची पदे असतानाही नाही सोडली उंटाची अडीच घरांची तिरकी चाल!
बाबासाहेब भोस यांना दोनदा पंचायत समितीचे सभापतीपद, जि.प.चे उपाध्यक्ष आणि लागलीच पुढे अध्यक्षपद, लेबर फेडरेशनचे अध्यक्षपद, साखर कारखान्याचे उपाध्यक्षपद, नगरपरिषदेत मुलगा गणेश दोन वेळा नगरसेवक एवढी सत्ता मिळाली. या सत्ताकाळात त्यांनी काय आणि कुठे दिवे लावलेहे श्रीगोंदा शहरासह तालुयाला चांगलेच ज्ञात आहे. १९९० च्या विधानसभा निवडणूकीपासून भोस यांचे राजकीय रेकॉर्ड ‘ट्रॅक’ केले की सामान्य नागरिकांसह मतदारांना त्यांच्या बुध्दीबळातील ऊंटाच्या अडीच घरांच्या तिरया चालींचा सगळा उलगडा झाल्याशिवाय राहणार नाही.
साजन पाचपुतेंच्या माध्यमातून झाली मांडवली!
पालिका निवडणुकीत मतांचे विभाजन झाले तरच आपला विजय असल्याचे गणित माजी मंत्री बबनराव पाचपुते यांनी हेरले. मग हे मतांचे विभाजन करण्यासाठी साजन पाचपुते यांच्या माध्यमातून बाबासाहेब भोस यांची मांडवली करण्यात आली आणि त्यातून भोस यांनी या निवडणुकीत उडी घेतली हे स्पष्टपणे समोर आले आहे. या निवडणुकीत साजन पाचपुते कुठेही का दिसत नाही हा देखील प्रश्न आहे. शिवसेना उपनेते पद असताना त्यांनी मारलेली दांडी आणि भोस यांची पुरस्कृत केलेली उमेदवारी बरेच काही सांगून जात आहे.
पाचपुते बंधुंच्या इशार्‍यावर भोस मैदानात!
या निवडणुकीत शिवसेनेचे उपनेते साजन पाचपुते यांनी महत्वपूर्ण जबाबदारी पार पाडली, त्यांनीच भोस यांना ‘अर्थ’पूर्ण मदतीचा हात पुढे केला. साजन पाचपुते हे जसे यात पडद्याआड राहिले तसेच आ. विक्रम पाचपुते हेही! मविआचा पॅनल असतानाही साजन पाचपुते या निवणुकीतून गायब झाले यातच सारे काही आले! भोस यांना पुढे करुन साजन पाचपुतेंनी स्वत:ची जबाबदारी पार पाडली. मतांचे विभाजन झाले तरच भाजपाच्या खेतमाळीस विजयी होऊ शकतात हे वास्तव पाचपुतेंच्या लक्षात आले आहे. त्यामुळेच दोन्ही पाचपुते बंधू एक झाले आणि बाबासाहेब भोस यांना गळाला लावले!
