मुंबई | नगर सह्याद्री
केंद्रीय निवडणूक आयोगाने जम्मू-काश्मीर आणि हरियाणा या दोन्ही राज्यांतील विधानसभा निवडणुकीची घोषणा शुक्रवारी केली. गेल्या तीन निवडणुकांत हरियाणा आणि महाराष्ट्रातील निवडणुकांची घोषणा एकाच वेळी झाली होती. पण, महाराष्ट्राची निवडणूक दिवाळीनंतर होण्याचे संकेत निवडणूक आयोगाने दिले आहेत. तरी, ही निवडणूक विधानसभेची मुदत संपल्यावर, अर्थात डिसेंबरच्या पहिल्या किंवा दुसर्‍या आठवड्यात होण्याची शक्यता वर्तवली जात आहे.शिंदे सरकारच्या लाडकी बहीण योजनेमुळे निवडणूक लांबणीवर पडली असल्याचे सांगितले जात आहे. विधानसभेची मुदत २६ नोव्हेंबरला संपणार आहे. त्यामुळे मुदतीपूर्वी विधानसभा अस्तित्वात न आल्यास राष्ट्रपती राजवट लागू होऊ शकते. त्यानंतर डिसेंबरमध्ये विधानसभेची निवडणूक होऊ शकते अशी चर्चा राजकीय वर्तुळात सुरू आहे.
लोकसभेला जनतेने आस्मान दाखविल्यानंतर विधानसभेच्या पार्श्वभूमीवर सावधगिरीने पावले टाकली जात आहे. पुन्हा सत्तेत येण्यासाठी त्यातच मध्य प्रदेशच्या धर्तीवर महाराष्ट्रातही शिंदे सरकारने लाडकी बहीण योजना लागू केली आहे. त्याअंतर्गत महिलांना दरमहा दीड हजार रूपये दिले जाऊ लागले आहेत. योजनेचे दोन हप्ते रक्षाबंधनाच्या पूर्वी महिलांच्या खात्यांमध्ये जमा करण्यात आले.
पण, विधानसभेला महिला मतदारांची अधिकाधिक मते मिळवायची असतील, तर योजना जास्तीत जास्त महिलांपर्यंत पोहोचवणे गरजेचे आहे. त्यासाठी मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि उपमुख्यमंत्री अजित पवार राज्याच्या कानाकोपर्‍यात मेळावे घेत आहेत. त्यासह योजनेचे आणखी किमान दोन-तीन हप्ते तरी महिलांच्या बँक खात्यात जमा होणे आवश्यक आहे.
