अहमदनगर। नगर सहयाद्री-
नगर अर्बन कर्ज घोटाळा प्रकरणी पुन्हा एक ट्विस्ट समोर आला आहे. फॉरेन्सिक ऑडिटमध्ये ठपका असलेल्या १०५ जणांची यादी लिक झाल्यानंतर अनेक संशयित पसार झाले आहेत. त्यातील काहींसह ज्यांची या यादीत नावे नाहीत अशांनीही अटकपूर्व जामीन अर्जासाठी न्यायालयात धाव घेतली असल्यामुळे बँकेच्या वर्तुळात चर्चा रंगली आहे.
नगर अर्बन बँके घोटाळा प्रकरणातील अटकेत असलेल्यांनी जामीनासाठी न्यायालयात अर्ज सादर केले आहेत. तसेच, या व्यतिरिक्त चार जणांनी अटकपूर्व जामीनासाठी अर्ज दाखल केले आहेत. यातील आठ जामीन अर्जावर आज (१ एप्रिल) व एका जामीन अर्जावर उद्या (२ एप्रिल) न्यायालयात सुनावणी होणार आहे.
अटकेत असलेल्या अमित वल्लभराय पंडित याच्या जामीन अर्जावर उद्या सुनावणी होणार आहे. तर, राजेंद्र शांतीलाल लुनिया, प्रवीण सुरेश लहारे, अविनाश प्रभाकर वैकर यांच्या जामीन अर्जावर आज सुनावणी होणार आहे.
अनपेक्षित नावामुळे बँकेच्या वर्तुळात चर्चा
फॉरेन्सिक ऑडिटमध्ये ठपका असलेल्या १०५ जणांची यादी लिक झाल्यानंतर अनेक संशयित पसार झाले आहेत. त्यातील काहींसह ज्यांची या यादीत नावे नाहीत अशांनीही अटकपूर्व जामीन अर्जासाठी न्यायालयात धाव घेतली आहे. कमलेश हस्तीमल गांधी, महादेव पंढरीनाथ साळवे, यज्ञेश बबन चव्हाण, देवेंद्र दिलीप गांधी, प्रगती देवेंद्र गांधी यांनी न्यायालयात अटकपूर्व जामीनासाठी अर्ज दाखल केले आहेत. त्यावरही आज सुनावणी होणार आहे.
