Crime news: पुन्हा एक धक्कादायक घटना घडली असून शहराच्या कायदा व सुव्यवस्थेवर गंभीर प्रश्नचिन्ह उपस्थित झाले आहे. १६ वर्षीय अल्पवयीन मुलीवर चाकूचा धाक दाखवत अत्याचार केल्याची संतापजनक घटना घडली. या प्रकरणात तौहिद समीर बैद (वय अंदाजे २२) या तरुणावर गंभीर आरोप करण्यात आले आहेत.
मिळालेल्या माहितीनुसार, आरोपीने पीडितेला एकटे पाहून धमकावत चाकू दाखवला आणि तिच्यावर अत्याचार केला. पीडित मुलीने घडलेली घटना घरी सांगितल्यानंतर कुटुंबीयांनी तत्काळ पोलीस ठाण्यात धाव घेतली. घटनेनंतर परिसरात तणावाचे वातावरण निर्माण झाले असून, नागरिकांमध्ये भीतीचे सावट पसरले आहे. घटनेच्या पार्श्वभूमीवर बजरंग दलचे कार्यकर्ते मोठ्या संख्येने पोलीस ठाण्यात जमा झाले होते.
त्यांनी आरोपीला त्वरित अटक करावी आणि कठोर शिक्षा द्यावी, अशी मागणी करत पोलिस प्रशासनाला घेराव घातला. या घटनेनंतर भाजप आमदार रणधीर सावरकर आणि काँग्रेसचे आमदार साजिद खान पठाण यांनी पोलिस ठाण्यात भेट देत अधिकाऱ्यांशी चर्चा केली.
दोन्ही आमदारांनी आरोपीविरोधात कठोर कारवाईची मागणी करत संताप व्यक्त केला.पोलीस प्रशासनाने तत्काळ हालचाल करत आरोपीविरोधात पॉक्सो कायदा तसेच भारतीय दंड संहितेतील गंभीर कलमांखाली गुन्हा दाखल केला आहे. मात्र, आरोपी अद्याप फरार असून, त्याच्या अटकेसाठी दोन विशेष पथके रवाना करण्यात आली आहेत.
या घटनेमुळे अकोल्यातील डाबकी रोड परिसरातील नागरिकांमध्ये अस्वस्थता व भीतीचे वातावरण निर्माण झाले असून, विशेषतः मुलींच्या सुरक्षेचा प्रश्न पुन्हा ऐरणीवर आला आहे. पालक आपल्या मुलींच्या सुरक्षेबाबत चिंताग्रस्त असून, शहरातील अनेक सामाजिक संघटनांनी निषेध व्यक्त करत आरोपीला कठोरात कठोर शिक्षा देण्याची मागणी केली आहे.
