अहमदनगर । नगर सहयाद्री: –
विळद (ता. नगर) शिवारातील गवळीवाडा वॉटर फॉल येथे फिरण्यासाठी गेलेल्या युवकाला अज्ञात पाच जणांनी मारहाण करून त्याच्याकडील मोबाईल, चांदीची चेन, अंगठी व रोकड असा सहा हजार ९०० रूपयांचा ऐवज लुटला. या प्रकरणी एमआयडीसी पोलीस ठाण्यात काल, मंगळवारी पहाटे दरोड्याचा गुन्हा दाखल झाला आहे.
वैभव उत्तम सहजराव (वय २१ रा. जांब, ता. जि. परभणी, हल्ली रा. पंचवटीनगर, भिस्तबाग चौक, सावेडी, नगर) यांनी फिर्याद दिली आहे. विळद शिवारातील गवळीवाडा वॉटर फॉल परिसरात फिरण्यासाठी गेले होते. तेथे त्यांना पाच अज्ञात व्यक्तीने एकट्याला गाठले.
गचंडी पकडून लाथाबुक्क्यांनी व लाकडी दांडयाने मारहाण केली. त्यांच्याकडील मोबाईल, एक चांदीची चेन, एक चांदीची अंगठी व ४०० रूपये रोख रक्कम असा सहा हजार ९०० रूपयांचा ऐवज काढून घेतला.
दरम्यान, सदरचा प्रकार वैभव यांनी मंगळवारी एमआयडीसी पोलिसांना सांगून या प्रकरणी फिर्याद दिली आहे. पोलिसांनी अज्ञात पाच जणांविरूध्द दरोड्याचा गुन्हा दाखल केला आहे. अधिक तपास सहायक पोलीस निरीक्षक माणिक चौधरी करत आहेत.
