अहमदनगर। नगर सहयाद्री-
सासऱ्याला दिलेले पैसे परत न दिल्याच्या रागातून तरुणावर धारदार शस्राने हल्ला केल्याचा धक्कादायक प्रकार नगरच्या भिंगारमध्ये घडला आहे. कुमार सुभाष हजारे (वय २८ रा. सुदर्शन कॉलनी, वडारवाडी, भिंगार) असे हल्ला झालेल्या तरूणाचे नाव आहे. त्यांच्यावर खासगी रूग्णालयात उपचार सुरू असून त्यांनी दिलेल्या जबाबावरून आठ ते नऊ जणांविरोधात भिंगार कॅम्प पोलीस ठाण्यात गुन्हा दाखल करण्यात आला आहे.
कृष्णा बळराम खिळे, गोविंद बळराम खिळे, अर्जुन भिंगारदिवे, अनीकेत शिरसाठ (पूर्ण नावे माहिती नाही) व इतर तीन ते चार अनोळखी (सर्व रा. सिटीझन कॉलनी, वडारवाडी, भिंगार) यांच्या विरोधात गुन्हा दाखल करण्यात आला आहे.
अधिक माहिती अशी: रविवारी (दि. १७) दुपारी कुमार हजारे त्यांच्या दुचाकीवरून वडारवाडी येथे जात असताना त्यांना वरील संशयित आरोपींनी भारव्दाज किराणा दुकानासमोर, भिंगार येथे अडविले. सासऱ्याला दिलेले पैसे परत न दिल्याच्या कारणावरून लोखंडी कोयता, चॉपर, लाकडी दांडके व दगडाने जीवघेणा हल्ला केला.
शिवीगाळ, दमदाटी केली. या हल्ल्यात कुमार हजारे यांना गंभीर दुखापत झाली असून त्यांच्यावर नगरमधील खासगी रूग्णालयात उपचार सुरू आहेत. त्यांनी उपचारादरम्यान भिंगार कॅम्प पोलिसांना दिलेल्या जबाबावरून मंगळवारी (दि. १९) दुपारी गुन्हा दाखल करण्यात आला आहे. अधिक तपास पोलीस उपनिरीक्षक बोरसे करत आहेत.
