अहमदनगर / नगर सह्याद्री : अहमदनगर – सोलापूर महामार्गावरील शिरढोण उड्डाणपुलावर बोलेरो व डंपर यांचा भीषण अपघात झाला. यामध्ये बोलेरोचालक जागीच ठार झाला.
मंगेश दिलीप नागवडे (रा.गुणवडी) असे मयत व्यक्तीचे नाव आहे. अहमदनगर जिल्ह्यातील अपघातांची मालिका संपण्याचे नाव घेईना. नगर तालुक्यातील अपघाताच्या काही घटना ताजा असतानाच आज हा भीषण अपघात झाला.
शनिवारी (दि.१६ डिसेंबर) सकाळी १० च्या सुमारास शिरढोण उड्डाणपुलावर बोलेरो जीप व डंपर यांची समोरासमोर धडक झाली. यामध्ये बोलेरोचा चालक मंगेश दिलीप नागवडे हा जागीच ठार झाला.
डंपर चालक जखमी झाल्याचे समजते. अपघात इतका जोराचा होता की, बोलेरो जीपच्या पुढील भागाचा चुराडा झाला होता. अपघातानंतर स्थानिकांनी घटनास्थळी धाव घेत मदतकार्य केले. दुपारी उशिरापर्यंत पोलिसांचे तपासकार्य सुरु होते.
