अहिल्यानगर । नगर सहयाद्री
सोलापूर महामार्गावरील साकत शिवारातील पंजाबी ढाब्यावर अफूच्या पावडरची विक्री होत असल्याची गोपनीय माहिती मिळाल्यानंतर नगर तालुका पोलिसांनी छापा टाकून एका इसमाला अटक केली. या कारवाईत १० हजार रुपये किंमतीची ९४० ग्रॅम अफू पावडर जप्त करण्यात आली आहे. तालुका पोलीस ठाण्याचे पोलीस निरीक्षक प्रल्हाद गीते यांना गोपनीय बातमीदारामार्फत माहिती मिळताच, त्यांनी तत्काळ उपविभागीय पोलीस अधिकारी अमोल भारती यांना माहिती दिली.
त्यांनी कारवाईच्या सूचना दिल्यानंतर पथकाने गुरुवारी सायंकाळी ७ वाजता कारवाई केली. कारवाईदरम्यान, हॉटेल पंजाबी ढाब्यावर चंद्रकांत रघुनाथ शेळके (वय ५७, रा. गुणवडी, ता. जि. अहिल्यानगर) हा इसम संशयास्पदरीत्या फिरताना दिसून आला. पोलीस पथकाने त्याची व हॉटेलची झडती घेतली असता, त्याच्याकडे विक्रीसाठी ठेवलेली अफूची पावडर सापडली. याप्रकरणी आरोपी विरोधात नगर पोलीस ठाण्यात गुन्हा दाखल करण्यात आला आहे.
सदरची कारवाई पोलीस अधीक्षक सोमनाथ घार्गे, अप्पर पोलीस अधीक्षक प्रशांत खैरे व उपविभागीय पोलीस अधिकारी अमोल भारती यांच्या मार्गदर्शनाखाली पोलीस निरीक्षक प्रल्हाद गीते, पोलिस उपनिरीक्षक पंतगे, पोलिस उपनिरीक्षक भरत धुमाळ, पोहेकॉ बाबासाहेब खेडकर, पोहेकॉ शरद वाढेकर, मपोना गायत्री धनवडे, मपोका सोनाली देशमुख पोका सागर मिसाळ यांनी केली आहे.
