अहिल्यानगर | नगर सह्याद्री:-
अहिल्यानगर- पुणे महामार्गावर चास (ता. नगर) शिवारात एसटी बस ट्रेलरवर आदळून झालेल्या अपघातात बस चालकासह आठ जण जखमी झाले आहेत. भारत पेट्रोल पंपासमोर रविवारी दुपारी साडेतीनच्या सुमारास ही घटना घडली. या प्रकरणी बस चालकाविरूध्द सोमवारी नगर तालुका पोलीस ठाण्यात गुन्हा दाखल करण्यात आला आहे. उमेश प्रकाश सोनवणे (वय 36 रा. शिरूर, ता. अंमळनेर, जि. जळगाव) असे गुन्हा दाखल झालेल्या बस चालकाचे नाव आहे.
ट्रेलरचा चालक समसाद खान (वय 40 रा. छत्तीसगढ) याने फिर्याद दिली आहे. बंडु शांतराम पवार (वय 28), पुजा बंडु पवार (वय 25), आर्यन बंडु पवार (वय 2, सर्व रा. खडकी ता. चाळीसगाव, जि. जळगाव), लक्ष्मीबाई धोंडु पाटील (वय 75 रा. पारोळा, ता. जि. जळगाव), फामिता बाबुमियाँ जहागिरदार (वय 70 रा. मुकुंदनगर, अहिल्यानगर), आयशा शाकिर सय्यद (वय 30), अफजल शाकिर सय्यद (वय 9, दोघे रा. हडपसर, पुणे) व बस चालक उमेश सोनवणे (वय 36) हे जखमी झाले आहेत.
उमेश सोनवणे हा त्याच्या ताब्यातील अंमळनेर ते पुणे जाणारी एसटी बस (एमएच 20 बीएल 2401) घेऊन अहिल्यानगर- पुणे महामार्गावरून प्रवास करत असताना चास शिवारात भारत पेट्रोलपंपा जवळ बसने पुढे जाणाऱ्या ट्रेलरला (सीजी 07 सीए 6138) धडक दिली. या धडकेत बस चालकासह आठ जण जखमी झाले असून दोन्ही वाहनाचे नुकसान झाले असल्याचे फिर्यादीत नमूद केले आहे. अधिक तपास पोलीस अंमलदार ए. डी. झावरे करत आहेत.
