Ahilyanagar Car Accident: विवाह समारंभ उरकून घराकडे परत येत असलेल्या बोलोरो जीपला दुचाकीस्वार आडवा आल्याने त्याला वाचवण्याच्या प्रयत्नात चालकाचे बोलोरोवरील नियंत्रण सुटल्याने दुचाकीस्वाराला चिरडून बोलोरो लिंबाच्या झाडाला आदळली. यामध्ये दुचाकीस्वारासह तीन ठार झाले तर सहा जखमी झाले आहे. अपघातात दुचाकीस्वार दिगंबर शिंदे, गोपिका जाधवराव, देवयानी जाधवराव यांचा मृत्यू झाला तर सुशील हरिश्चंद्र इंगळे, दिलीप जाधवराव, उज्वला इंगळे, जनार्दन जाधवराव, प्रकाश धुमाळ, सुप्रिया धुमाळ या जखमींवर रुग्णालयात उपचार सुरू आहेत.
टाकळीभान येथील प्रगतशिल शेतकरी शिवाजीराव धुमाळ यांच्या मुलाचा विवाह प्रवरासंगम येथे आयोजित केला होता. विवाह सभारंभ आटोपुन घरी टाकळीभान येथे परतत आसताना, टाकळीभान-श्रीरामपूर राज्यामार्गार टाकळीभान शिवारातील स्वस्तीक ट्रेंडिंग दुकानासमोर दिगंबर पांडूरंग शिंदे (वय 65, रा- गुजरवाडी) टीव्हीएस मोपेड (नं. एमएच 17 डीबी 9707) हे अचानक बोलेरो (नं. एमएच 17 क्यु 1795) गाडी समोर आल्याने त्यांना वाचविताना चालकाचे वहानवरील नियंत्रण सुटल्याने बोलेरो बाजूच्या लिंबाच्या झाडाला घासल्याने बोलोरो जीपचा पत्रा उचकटुन अपघात घडला.
त्यामुळे बोलेरो गाडीत बसलेल्या धुमाळ यांच्या नातेवाईकांना जबर ईजा झाली. या अपघातात बोलेरो जीपचा चक्काचूर झाला आहे. तर मोपेडचेही मोठे नुकसान झाले आहे. बोलेरोमध्ये एकूण आठजण प्रवास करत होते. वर्दळीच्या ठिकाणी हा अपघात झाल्याने तरुणांनी त्वरीत मदतीसाठी घटनास्थळाकडे धाव घेतली. जखमींना बोलेरो जीप मधून बाहेर काढले व तातडीने श्रीरामपूर येथील साखर कामगार रुग्णालयात दाखल केले. उपचारा दरम्यान दुचाकीस्वारासह तीन ठार झाले. तर दोघांची प्रकृती अत्यावस्थ असल्याने अहील्यानगर येथे पुढील उपचारासाठी पाठविण्यात आले आहे.
