Ladki Bahin Yojana: रक्षाबंधनच्या पार्श्वभूमीवर राज्य सरकारकडून महिलांसाठी एक आनंदाची बातमी आहे. मुख्यमंत्री माझी लाडकी बहीण योजनेचा जुलै हप्ता लवकरच खात्यात जमा होणार असून, ऑगस्टचा हप्ता देखील त्याच दिवशी मिळण्याची शक्यता वर्तवली जात आहे. त्यामुळे या रक्षाबंधनला महिलांच्या खात्यात थेट ₹३००० जमा होण्याची शक्यता आहे.
महिला व बालविकास विभागाने ३० जुलै रोजी अधिकृत शासन निर्णयाद्वारे २९८४ कोटी रुपयांचा निधी जुलै हप्त्यासाठी वर्ग केला आहे. त्यामुळे कोणत्याही क्षणी हप्ता खात्यात जमा होऊ शकतो. सरकारकडून ऑगस्ट हप्त्याचाही विचार सुरु असून, दोन्ही हप्ते एकत्र ९ ऑगस्ट रोजी रक्षाबंधन दिवशी देण्याची शक्यता सूत्रांनी वर्तवली आहे.
योजनेतून तब्बल २६.३४ लाख महिलांचे अर्ज निकषांमध्ये न बसल्यामुळे बाद करण्यात आले असून, उर्वरित पात्र महिलांच्या खात्यातच रक्कम जमा होईल. मंत्री आदिती तटकरे यांनी याबाबत अधिकृत माहिती दिली आहे.
या योजनेतून पात्र महिलांना दर महिन्याला ₹१५०० इतकी आर्थिक मदत दिली जाते. जुलै हप्ता रखडल्याने अनेक महिलांनी सोशल मीडियावर नाराजी व्यक्त केली होती. मात्र आता राखीच्या सणाला आर्थिक मदत मिळाल्याने अनेक महिलांच्या चेहऱ्यावर आनंद फुलणार आहे.