अहिल्यानगर / नगर सह्याद्री –
श्रीकृष्णनगर, केडगाव येथील प्लॉट क्रमांक ३० येथे अज्ञात चोरट्याने घरफोडी करून २ लाख ५४ हजार १०० रुपये किमतीचे सोन्या-चांदीचे दागिने चोरल्याची घटना उघडकीस आली आहे.
याप्रकरणी स्वप्नील समाधान सावळे (वय २३, रा. केडगाव, अहिल्यनगर) यांनी कोतवाली पोलीस ठाण्यात अज्ञात व्यक्तीविरुद्ध फिर्याद दाखल केली आहे.सावळे यांनी दिलेल्या फिर्यादीनुसार, २१ जुलै २०२५ रोजी पहाटे ५ वाजता त्यांचे चुलते गजानन शामराव सावळे यांनी फोनवर आजी विठाबाई शामराव सावळे यांच्या निधनाची बातमी कळवली. त्यानंतर स्वप्नील, त्यांची आई कल्पना समाधान सावळे आणि भाऊ राहुल समाधान सावळे मूळ गावी जळगाव सपकाळ येथे गेले. सर्व विधी आटोपून ते गावीच थांबले होते.२ ऑगस्ट २०२५ रोजी शेजारी बबन सोनटक्के यांनी स्वप्नील यांना फोन करून घराचे दार उघडे असल्याचे सांगितले.
बबन यांनी घराची पाहणी केली असता, दरवाजाचे कुलूप तुटलेले दिसले. स्वप्नील नगरमध्ये येवून पाहिले असता आईचे सोन्या-चांदीचे दागिने गायब असल्याचे लक्षात आले. १ तोळ्याचे गहू मणी पोत, ३ ग्रॅमचे पेंडल, २ तोळ्याचे शॉट गंठण, ३ तोळ्याचे मिनी गंठण, १ तोळ्याचे कानातील वेल, ९ ग्रॅमच्या तीन अंगठ्या, २ ग्रॅमचे बाळे आणि ७ भार वजनाच्या चांदीच्या पायातील पट्ट्या यांचा समावेश आहे.
