अहमदनगर । नगर सहयाद्री:-
शेत जमिनीच्या वादातून भावाचा खून केल्याप्रकरणी जिल्हा न्यायाधीश सुधाकर व्ही. यार्लगड्डा यांनी दिनकर अण्णाजी गव्हाणे (वय 65, रा. अल्हणवाडी) याला भादंवि कलम 302 अंतर्गत दोषी ठरवून जन्मठेप व 5000 रुपये दंडाची शिक्षा ठोठावली आहे. दिनकर अण्णाजी गव्हाणे (वय 65 रा. अल्हणवाडी, ता. पाथर्डी) असे शिक्षा झालेल्या आरोपीचे नाव आहे. याप्रकरणात सरकार पक्षातर्फे अतिरीक्त सरकारी वकील अनिल घोडके यांनी काम पाहिले.
2 नोव्हेंबर 2022 रोजी सकाळी 11.30 वाजता शहाबाई व पती मधुकर हे शेतात जात असताना दिनकर व त्याचा पुतण्या संतोष माणिक गव्हाणे हे रावसाहेब गव्हाणे यांच्या घराजवळ हातात खोरे व दगड घेवून आले. मागील भांडणाच्या कारणावरून त्यांनी मधुकर यांना मारहाण करून गंभीर जखमी केले होते. उपचारादरम्यान 14 नोव्हेंबर 2022 रोजी मधुकर यांचा मृत्यू झाला.
त्यांच्या मृत्यूनंतर आरोपींविरूध्द वाढीव कलम 302 लावण्यात आले. आरोपीला अटक करून सदर गुन्ह्याचा तपास सहा. पोलीस निरीक्षक पी. बी. पाटील यांनी करून आरोपींविरूध्द दोषारोपपत्र येथील जिल्हा न्यायालयात पाठविले. सदर खटल्यात सरकारच्या वतीने 11 साक्षीदार तपासण्यात आले. त्यामध्ये फिर्यादी शहाबाई मधुकर गव्हाणे व रावसाहेब गव्हाणे यांची महत्त्वाची साक्ष नोंदविण्यात आली.
परंतु दोन्हीही साक्षीदार फितूर झाल्याने आरोपी नं.2 संतोष गव्हाणे याच्याविरूध्द पुरेसा पुरावा नसल्याने त्याला न्यायालयाने निर्दोष सोडले. सदरच्या खटल्यामध्ये डॉ.मनीषा हांडे, डॉ.स्नेहल दुग्गड यांच्या साक्षी महत्त्वपूर्ण ठरल्या. सदर प्रकरणात पैरवी अधिकारी पोलीस अंमलदार महेश जोशी व अरविंद भिंगारदिवे यांनी सरकारी वकील यांना खटल्याच्या कामकाजाच्यावेळी सहाय्य केले.
