अहिल्यानगर । नगर सहयाद्री:-
विधान परिषदेचे सभापती प्रा. राम शिंदे आणि विधान परिषद सदस्यांविषयी अवमानकारक वक्तव्य केल्याप्रकरणी शरद पवार गटाचे कार्यकर्ते सूर्यकांत मोरे यांच्यावर विशेषाधिकार भंगाची कारवाई करावी, अशी औपचारिक मागणी भाजपाचे विधान परिषदेतील गटनेते आणि गृहनिर्माण स्वयं समूह पुनर्विकास प्राधिकरणाचे अध्यक्ष प्रवीण दरेकर यांनी केली आहे.
दरेकर यांनी सांगितले की, 23 नोव्हेंबर रोजी जामखेड नगरपरिषद निवडणूक प्रचार सभेत बोलताना मोरे यांनी विधान परिषदेचे सभापती प्रा. राम शिंदे तसेच सदस्यांविषयी अतिशय अवमानकारक आणि दिशाभूल करणारी भाषा वापरली. या वक्तव्यामुळे सभागृहाची प्रतिष्ठा धुळीला मिळाल्याचा आरोप त्यांनी केला. मोरे यांनी वरिष्ठ सभागृहाचा आणि प्रत्येक सदस्याचा अपमान केला आहे. ही कृती स्पष्टपणे विशेषाधिकारभंग ठरते, असे दरेकर म्हणाले.
दरेकर यांनी स्पष्ट केले की, संविधान कलम 194 नुसार राज्य विधानमंडळ आणि सदस्यांना विशिष्ट विशेषाधिकार आहेत. सभागृहाच्या मानहानीस कारणीभूत ठरणारी कोणतीही कृती कामकाजावर परिणाम करत असल्यास ती विशेषाधिकारभंगात मोडते. त्यामुळे मोरे यांच्यावर कारवाई अनिवार्य असल्याचे त्यांनी सांगितले. मोरे यांचे वक्तव्य सुरू असताना राष्ट्रवादी काँग्रेसचे आमदार रोहित पवार हसत होते, असेही दरेकरांनी निदर्शनास आणले. शरद पवार, सुप्रिया सुळे, उद्धव ठाकरे, पृथ्वीराज चव्हाण, शशिकांत शिंदे हे सर्व विधान परिषदेचे सदस्य किंवा माजी सदस्य राहिले असल्याचे सांगत, मोरे यांनी केलेली टिप्पणी या सर्वांनाही लागू होते का? असा सवाल दरेकरांनी उपस्थित केला.
मविआ नेत्यांवर टीका करताना दरेकर म्हणाले, त्यांचा लोकांवरचा विश्वास उडाला आहे. मैदानात उतरून लढण्याची ना उमेद उरली आहे ना हिम्मत. महायुतीचा पारदर्शक कारभार पाहून त्यांना टीकाही करता येत नाही. भाजपावर लोकांचा विश्वास असल्यामुळे 100 ठिकाणी बिनविरोध निवड झाली आणि त्यांची पायाखालची जमीन सरकली आहे. या संपूर्ण प्रकरणामुळे जामखेड ते विधान परिषदेसह राज्याच्या राजकीय वर्तुळात मोठी खळबळ उडाली आहे.
