अकोले | नगर सह्याद्री
पाणलोटात गुरूवारच्या तुलनेत शुक्रवारी पावसाचा जोर वाढल्याने धरणात शनिवारी नव्याने पाण्याची जोमाने वाढ होत आहे. परिणामी ११०३९ दलघफू क्षमतेच्या भंडारदरातील पाणीसाठा १०५२० दलघफू झाला असून काल सायंकाळी विसर्ग ७४२०युसेकने प्रवरा नदीत सोडण्यात येत आहे. त्यामुळे निळवंडे धरणातीलही पाणीसाठा वेगाने वाढत असून आज हा पाणीसाठा ६५ टक्क्यांच्या पुढे जाणार आहे. दरम्यान, १०६० दलघफू क्षमतेचे आढळा धरणही भरले असून ४० युसेकने विसर्ग सुरू आहे.
शुक्रवारी रात्री १२ तासांत धरणात नव्याने २७७ दलघफू पाणी आल्याने भंडारदरातील पाणीसाठा १०३६३ दलघफू होता. त्यामुळे विसर्ग १९२८ युसेकने सुरू होता. पण पाऊस सुरू असल्याने आणि आवक वाढल्याने सायंकाळी धरणातील पाणीसाठ १०५२० दलघफू कायम ठेवून सायंकाळी ६ वा. ४७११ युसेकपर्यंत विसर्ग वाढविण्यात आला. त्यानंतर आषाढ सरी जोरदार कोसळत असल्याने सायंकाळी ७ वाजता ७४२० युसेकपर्यंत विसर्ग वाढविण्यात आला. परिणामी निळवंडे धरणाचा साठा तासागणिक वाढू लागल आहे.
सायंकाळी निळवंडेतील पाणीसाठा ६०.४० टक्के झाला होता. पण त्यानंतर आवक आणखी वाढल्याने आज शनिवारी या धरणातील पाणीसाठा ६५ टक्क्यांच्या पुढे जाण्याची शयता आहे. गत २४ तासांत नोंदवला गेलेला पाऊस असा-मिमी. भंडारदरा- ५२, घाटघर ९७, रतनवाडी ९३, पांजरे ८५. काल दिवसभरात भंडारदरात पडलेल्या पावसाची नोंद ५२ मिमी झाली आहे.
