पार्सल घरी पाठविण्याचे उपमुख्यमंत्री अजित पवार यांचे मतदारांना आवाहन
पारनेर | नगर सह्याद्री
अहमदनगर लोकसभा मतदारसंघातील प्रचार आता शेवटच्या टप्प्यात आला असून शेवटच्या टप्प्यात प्रचाराच्या तोफा धडाडत आहेत. शुक्रवारी सकाळी कर्जत येथे आणि दुपारी पारनेरमध्ये उपमुख्यमंत्री अजित पवार यांनी सभा घेत आमदार रोहित पवार व माजी आमदार निलेश लंके यांचा खरपूस समाचार घेतला. पारनेरच्या सभेत निलेश लंके याचा बंदोबस्त करा अन त्याचे पार्सल घरी पाठवा असे आवाहन उपमुख्यमंत्री अजित पवार यांनी केले.
अहमदनगर लोकसभा मतदारसंघातील महायुतीचे उमेदवार खासदार डॉ. सुजय विखे पाटील यांच्या प्रचारार्थ उपमुख्यमंत्री अजित पवार यांनी कर्जत, पारनेरमध्ये जाहीर सभा घेतली. यावेळी महायुतीचे पदाधिकारी मोठ्या संख्येने उपस्थित होते.
अजित पवार म्हणाले, मागच्या विधानसभा निवडणुकीत तुमच्या सांगण्यावरुन निलेश लंकेला उमेदवारी दिली. परंतु, आता तो तुमच्याही पुढचा निघाला आहे. लंके आमदार असताना मी अर्थमंत्री होतो. त्यांना साडेचार वर्षांत मी निधी दिलेला आहे. त्यामुळे जो विकास दिसतोय त्यामागे मी आहे. कोणतेही काम करताना अनुभव असला पाहिजे.
पारनेरमध्ये अधिकारी, उद्योजक, कर्मचार्‍यांवर दादागिरी केली जात आहे. आमच्या कार्यकर्त्यांनाही बघून घेण्याची भाषा वापरली जात आहे. हे मी कदापीही खपवून घेणार नसल्याचा खणखणीत इशारा देत निलेश लंकेंचा बंदोबस्त करा अन पार्सल घरी पाठविण्याचे आवाहन यावेळी मतदारांना केले. तसेच अहमदनगर जिल्ह्याचा विका करायचा असेल तर खासदार डॉ. सुजय विखे पाटील यांना मोठ्या मताधिक्क्याने निवडून देण्याचे आवाहनही त्यांनी केले. यावेळी पदाधिकार्‍यांची भाषणे झाली.
