अहमदनगर। नगर सहयाद्री
चांदगांव, ता. शेवगांव येथील शेतातील रस्त्याच्या कारणावरून खुनाचा प्रयत्न करणारे २ आरोपी स्थानिक गुन्हे शाखेकजय पथकाने जेरबंद केले आहे. महादेव अंकुश गायके ( वय २०) गणेश जालींदर गायके (वय १९) दोन्ही (रा. बेलगांव, ता. शेवगांव) असे आरोपीचे नाव आहे.
दिनांक १३ जुलै, २०२४ रोजी फिर्यादी गोपीचंद अश्रु पोपळे (वय ६५, रा. बेलगांव, ता. शेवगांव) हे त्यांची पत्नी व मुलगा यांच्यासोबत शेतात रस्त्याची दुरुस्ती करत होते. यावेळी रामदास गायके व इतर ५ इसमांनी फिर्यादी व त्यांच्या कुटुंबियांवर हातातील कुऱ्हाड, लाकडी दांडके, काठ्या व कोयता वापरून जिवे ठार मारण्याचा प्रयत्न केला. या घटनेबाबत शेवगांव पोलीस ठाण्यात गुन्हा नोंदविण्यात आला होता.
त्यानंतर पोलीस अधीक्षक राकेश ओला यांनी स्थानिक गुन्हे शाखेचे पोनि दिनेश आहेर यांना आरोपींचा शोध घेण्याचे आदेश दिले. या आदेशान्वये पोनि दिनेश आहेर यांनी पोउपनि तुषार धाकराव, पोहेकॉ संतोष लोढे, पोना फुरकान शेख, पोकों रविंद्र घुगांसे, जालिंदर माने, मयुर गायकवाड व पोहेकों उध्दव टेकाळे यांचे पथक तयार केले.
दिनांक ०२ ऑगस्ट २०२४ रोजी गुप्त माहितीच्या आधारे आरोपी महादेव गायके व गणेश गायके हे पाथर्डी तालुक्यातील वृध्देश्वर कारखाना परिसरात येणार असल्याची माहिती मिळाली. पथकाने तत्काळ कारखाना परिसरात जाऊन आरोपींचा शोध घेतला आणि त्यांना शिताफीने ताब्यात घेतले. आरोपींनी मारहाणीची कबुली दिल्यानंतर त्यांना शेवगांव पोलीस स्टेशनला हजर केले गेले. पुढील तपास शेवगांव पोलीस स्टेशन करीत आहे.
