Railway Crossing Accident: तामिळनाडूच्या कडलूर जिल्ह्यातील सेम्मानगुप्पम भागात आज सकाळी एक हृदयद्रावक अपघात घडला. फाटक नसलेल्या रेल्वे क्रॉसिंगवर स्कूल बस आणि रेल्वे यांची भीषण धडक झाली. या दुर्घटनेत दोन चिमुकल्या विद्यार्थ्यांचा जागीच मृत्यू झाला असून १० हून अधिक मुले आणि बस चालक गंभीर जखमी झाले आहेत.
प्राथमिक माहितीनुसार, स्कूल बस चालकाने निष्काळजीपणाने रेल्वे ट्रॅक पार करण्याचा प्रयत्न केला आणि त्याच वेळी भरधाव वेगात येणाऱ्या रेल्वेने बसला जोरदार धडक दिली. या धडकेमुळे बस जवळपास ५० ते ७० मीटरपर्यंत फरफटत गेली आणि रेल्वे ट्रॅकच्या कडेला झुडपात जाऊन पडली.
अपघात इतका तीव्र होता की बसचा चक्काचूर झाला असून, बचाव कार्य सुरू असून जखमींवर जवळच्या रुग्णालयात उपचार सुरू आहेत. काही मुलांची प्रकृती चिंताजनक असल्याने मृतांची संख्या वाढण्याची भीती व्यक्त केली जात आहे.
या घटनेमुळे स्थानिकांमध्ये संतापाची लाट उसळली असून रेल्वे प्रशासन आणि स्थानिक यंत्रणेवर निष्काळजीपणाचे आरोप करण्यात येत आहेत. अपघात झालेल्या ठिकाणी रेल्वे फाटक नसल्याचे आणि तेथे कोणतीही सुरक्षा व्यवस्था नसल्याचे निदर्शनास आले आहे.
स्थानिक पोलीस आणि रेल्वे अधिकारी या प्रकरणाचा तपास करत आहेत. या दुर्घटनेने संपूर्ण राज्यात शोककळा पसरली असून, पालकवर्ग आणि नागरिकांनी अशा क्रॉसिंगवर त्वरित सुरक्षा उपाययोजना राबवण्याची मागणी केली आहे.
