अहमदनगर | नगर सह्याद्री:-
भर रस्त्यात दोन तरुणांना मारहाण केल्याची धक्कादायक घटना घडली आहे. रस्त्यात ड्रोनच्या घिरट्या आणि पुढे घडलेला प्रकार यामुळे परिसरात भीतीचे वातावरण निर्माण झाले आहे.
अधिक माहिती अशी: राहता तालुक्यामधील गळनिंब गावातील दोन युवक आपल्या दुचाकीवरून मित्राच्या घरी जात असताना भर रस्त्यात त्यांना आपल्या डोक्यावर ड्रोन फिरताना दिसले.
त्यांनी ड्रोनचा शोध घेण्यासाठी आपली दुचाकी थांबवली. दरम्यान ऊसाच्या शेतीतून एक व्यक्ती दगडफेक करीत समोर आला आणि धारदार स्टिकने हल्ला केला.
एक युवक हल्ल्यात जखमी झाला, पण दुसऱ्याने प्रतिकार करत स्टिक ताब्यात घेतला. हल्ला करणाऱ्या व्यक्तीने वेगळी भाषा बोलत साथीदारांना आवाज दिला, त्यामुळे दोन्ही युवक जीव मुठीत धरून शेजारील वस्तीकडे पळाले.
त्यानंतर गळनिंब उक्कलगाव कुरणपूर येथील पाच – सहाशे युवक, ग्रामस्थ व लोणी पोलीस स्टेशनचे पोलीस यांनी फौज फाट्यासह उसाचे शेत पिंजून काढले पण ते मिळून आले नाही.
तसेच मध्यरात्री अनेक घरांवर दगड फेक झाल्याचेही नागरिक सांगत आहे. त्यामुळे परिसरात भीतीचे वातावरण पसरले आहे.
